Elisa Spiropali, ministre e qeverisë aktuale dhe e deleguar e Kryesisë së PSSH- së për Qarkun e Shkodrës, ka intensifikuar aktivitetin e saj politik. Nga emërimi si e deleguar e PS- së për Shkodrën, duke zëvendësuar ministren Edona Bilali, ajo ka zhvilluar takime me strukturat socialiste në të gjitha bashkitë e qarkut.
Por tashmë, mesa duket, Elisa Spiropali ka filluar fushatën elektorale për zgjedhjet e ardhshme vendore. Ajo ka nisur takimet përtej radhëve të strukturës socialiste, madje duke shfrytëzuar dëgjesat publike të qeverisjes vendore, në kuadër të hartimit të projektbuxheteve të tyre për vitin 2023.
Nisjen e fushatës e ka njoftuar vetë Spiropali, duke postuar foto edhe disa rreshta për takimin e zhvilluar në Gruemirë të Malësisë së Madhe. Në shënimin e saj, Spiropali shkruan:
“Gruemirë, Malësi e Madhe – Dëgjesë publike ku diskutuam për shqetësimet, nevojat dhe prioritetet e këtij komuniteti që do të reflektohen edhe në hartimin e buxhetit 2023 të bashkisë.
Kemi bërë investime në infrastrukturë, bujqësi & agroturizëm dhe mbështetja për banorët e kësaj zone nuk ka munguar. Vijojmë punën me përulësi për t’i shërbyer të gjithë qytetarëve pa dallim.”.
Dëgjesat publike janë detyrim ligjor i qeverisjes vendore dhe natyrisht, marrin pjesë drejtuesit e bashkive dhe këshillave bashkiakë. Për shkak të pozicionit, marrin pjesë edhe deputetë të bashkive ku zhvillohen dëgjesat publike. Spiropali nuk ka asnjë nga këto cilësi, përveç se e deleguar e Kryesisë së PS- së për Qarkun Shkodër. As posti i ministres për Marrëdhënien me Parlamentin, nuk mund të përdoret si mbulesë.
Pas zgjedhjeve anomale të 30 qershor 2019, në 4 nga 5 bashkitë e Qarkut Shkodër qeverisin vetëm socialistët në nivel kryebashkiaku dhe këshilave bashkiakë. Mesa duket, Spiropali i konsideron zgjatime të PS- së dhe pjesëmarrjen e propagandën në takime, i konsideron të natyrshme. Nga ana tjetër, opozita vendore në Qarkun e Shkodrës, PD- ja zyrtare apo jo zyrtare, nuk ndjehet… /ShkodraWeb/
