Ish kryeministri Sali Berisha ka qenë i pranishëm në ceremoninë përkujtimore të kryengritjes në Postribë të mbajtur të premten në Shkodër, nga ku u shpreh se ajo, si kryengritja e para antikomuniste në Shqipëri dhe Evropë ishte “kryengritje për liri, për flamur kombëtar, e atdhetarëve, patriotëve që donin një Shqipëri të lirë nga diktatura komuniste dhe padronët e tyre jugosllavë”.
Berisha hoqi vija paralele mes periudhës së para 76 viteve dhe ditëve të sotme, me qeverisjen e Edi Ramës, të cilin e quajti “cubin” e Shqipërisë që vjedh shqiptarët.
“Kanë kaluar 76 vite, sot ne përsëri Shqipëri është në një rrezik të madh sepse ajo përjeton vendosjen e monizmit, e pushtetit të një partie të përqendruar në duart e një cubi, që s’ka moral, s’ka nder, asgjë, vjedh, plackit qytetarët shqiptarë cdo ditë, ky është Edi Rama, për ti shtypur, vjedhur e më shumë.
Me rritjen e çmimeve fiton qindra milionë, qytetarët i mashtron me thërrime, sot përsëri Postriba është në rrezik, Shqipëria është në rrezik ndaj dhe ne duke u përulur para qëndresës, heroizmit të qindra burrave të Postribës, le të zotohemi para këtij monumenti se idealet e tyre të lirisë do i mbrojmë dhe se Shqipërinë do e shpëtojmë nga ky regjim armiqësor, i egër, hajdut që po shkatërron çdo ditë qenien shqiptare.
Ju ftoj të vijojmë qendresën tonë deri në përmbysjen përfundimtare të një armiku të egër, të votës të pasurive tona që quhet Edi Rama”, tha Berisha.
Në takimin e organizuar, ishin të pranishëm kryebashkiaku i Shkodrës Bardh Spahia si dhe deputetët e PD- së Emilia Koliqi, Greta Bardeli dhe Zef Hila.