Në grupet e komunikimit në Whatsapp të gazetarëve shkodranë, është shpërndarë një njoftim, i cili është dërguar nga Pal Shkambi, emër i njohur në Shkodër. Në këtë njoftim lexohet:
“Grupi Nismëtar për monumetin e Lekë Dukagjinit, ka njoftuar Kryetarin e Bashkisë Shkodër Z. Benet Beci, se me datë 11-03-2024, ditën e Hëne ora 10. 00, “Përfaqësues të Dukagjinit”, do paraqiten pranë Bashkisë Shkodër për takim me Kryetarin e Bashkisë.
Duke qenë në pritje të stërgjatur për miratimin e lejes për vendosjen e këtij monumenti në vendin e duhur në qendër të Qytetit të Shkodrës dhe duke mos marrë asnjë përgjigje, kemi vendosur:
Të bashkohemi përpara Bashkisë Shkodër për të mundësuar takimin me Kryetarin e Bashkisë Shkodër Z. Benet Beci, për t’a zgjidhur këtë çështje. Bashkimi sa më serioz është domosdoshmëri, si për pronat e vendlindjes, monumetin e Lekës, rrugën dhe shumë çështje të tjera. Të përshëndes Pal Shkambi!”.
Në fakt është një njoftim i paprecedent, ku një person, ndoshta në emër të disa të tjerëve, njofton kryetarin e bashkisë për ditën e orën e një takimi. Në fakt, procedura normale është që të kërkohet takim me çdo drejtues institucioni, aq më shumë për një kryetar bashkie të zgjedhur. Por nuk është vetëm përcaktimi i datës dhe orës së takimit “detyrim- përcaktim” kryevashkiakut të Shkodrës. ShkodraWeb ka siguruar edhe letrën që Pal Shkambi, ka dorëzuar në bashki, të cilën mund ta shihni më poshtë.
Letra mban datën 6 mars dhe nuk ka të paktën as edhe një firmë. Kryetarit të bashkisë, i jepet “ultimatum” se ka 5 ditë afat për të pritur Pal Shkambin në takim. Pra, u dërëzua me 6 mars shkresa dhe me 11 mars 2024, kryetari i bashkisë duhet detyrimisht të presë Palin dhe të tjerë. Sigurisht, nuk është ligjore por as morale e burrërore kjo qasje me asnjë zyrtar të këtij shteti.
Megjithatë, Bashkia Shkodër i është përgjigjur kësaj shkrese. Në dokumentin që ka siguruar ShkodraWeb dhe që mund ta lexoni më poshtë, siç është e kuptueshme, kryetari i bashkisë, i çdo bashkie qoftë, ka angazhime, impenjime, agjendë. Dhe sigurisht, me mirësjellje Pal Shkambit i komunikohet me 8 mars 2024, se do ti caktohet një datë për takimin.
Në fakt, duket se janë ngatërruar disi vëndet. Vendimet për çeshtje publike, merren nga të zgjedhurit me votë, në këtë rast, nga kryetari i bashkisë dhe Këshilli Bashkiak. Vendimi i marrë nga Pal Shkambi që, me datë 11 prill 2024, ora 10.00, duhet të pritet nga kryetari i bashkisë, mund të ngjallë vetëm të qeshura. Sigurisht, edhe të mbahet mend si “vendimi” i parë i marrë ndaj një kryetari bashkie se kur duhet të presë një person, madje me afat 5 ditor zbatimi. Vështirë që burrat e mençur të Dukagjinit, të bashkuar për një kauzë të rëndësishme, të përfshihen në këtë mesele, të ndërtuar në këtë formë.
Kjo sjellje nuk i lejohet një qytetari të thjeshtë, jo më një avokati, siç prezantohet Pal Shkambi, i cili ka konkurruar edhe për organet e “drejtësisë së re”, pasi më herët ka qenë kryetar i një partie politike, ka garuar dhe normalisht, nuk ka fituar asnjëherë. Për ta mbyllur, duhet ditur emri i personit që i jepet “vendimi” për takim. Jo ti ndryshohen germat e emrit apo të shtohen me stilolaps. Nuk i bën nder as Lekë Dukagjinit kjo qasje.
