Basha mbledh grupin parlamentar, te henen merret vendimi politik

Pas mbylljes së seancës plenare të Kuvendit dhe përjashtimit të Lulzim Bashës nga Kuvendi vetëm për ditën e sotme nga Gramoz Ruci, pasi sipas këtij të fundit kryedemokrati ‘pushtoi’ foltoren, kreu i PD ka thirrur mbledhjen e grupit parlamentar me urgjencë, seancë që ka zgjatur disa minuta.

Mësohet se PD ka vendosur që të kërkojë mbajtjen e seancës parlamentare për reformën zgjedhore ditën e hënë. Gjithashtu PD do të ngrejë grup pune për të analizuar rregulloren e Kuvendit, pasi sipas tyre mazhoranca po i ngushton hapësirat opozitës.

Më herët Basha tha se parlamenti po shkel të drejtën e fjalës së lirë dhe qytetarët duhet të marrin në dorë fatin e parlamentit. Basha tha se po bëhet atentat ndaj demokracisë.

“Pas këtij atentati ndaj demokracisë, Grupi Parlamentar i Partisë Demokratike do të shqyrtojë këtë gjendje të rëndë dhe do të rekomandojë hapat e mëtejshëm që Partia Demokratike, jo vetëm Grupi Parlamentar i saj, por edhe aleatët tanë, dhe gjithë qytetarët, do të hedhim së bashku. Ne nuk do të lejojmë kurrë që Gramoz Ruçi dhe Edi Rama ta kthejnë 30 vite pas orën e Shqipërisë”- tha Basha jashtë Kuvendit.