Kodi Zgjedhor e përcakton qartë se fushata zgjedhore është e ligjshme kur nis 30 ditë nga data e zgjedhjeve. Nëse zgjedhjet e dekretuara nga presidenti Meta do të zhvillohen me 30 qershor, fushata nuk mund të nisë para datës 30 maj 2019. Kështu e thotë ligji por në Shqipëri ka “ligj por edhe Maliq”.
“Maliqi” ynë e ka nisur tashmë fushatën zgjedhore. Të paktën nga fillimi i muajit mars, ai është në fushatë zgjedhore. “Beledijet që duam” nuk është asgjë tjetër perveç se një fushatë për të prezantuar kandidatët. E kështu, me mijëra tiranas dhe jo vetëm, mbushën sheshin me Tiranës me 23 mars për të prezantuar kandidatin për “beledijen e Tiranës”, Vilajet Qyrkun alias Erion Veliaj. Brenda 24 orëve të fundit, “Maliqi” ka prezantuar edhe dy kandidatë për kryetarë “beledijesh”, pikërisht në Kukës dhe në Lezhë. Në të tre këto raste, “Maliqi” nuk ka bërë thjeshtë takime për të njohur popullin me “sukseset” e qeverisjes në “beledijet” socialiste dhe keqqeverisjesn në ato që udhëheqin “ata”, pra opozita e sotme. Madje, ka krahasuar “beledijet” e tij me ato të “atyre”, duke u kërkuar të zgjedhin në krye të “beledijeve” që duam t’ua marrim atyre kandidatët që ofron “Maliqi” sepse janë më “të mirët.”. Çfarë bëhet apo thuhet më shumë se kaq në fushata zgjedhore, tashmë që edhe parrullat e pankartat është vendosur të hiqen?! Asgjë! Pra, “Maliqi” ynë është në fushatë elektorale.
A ka ndonjë institucion që të paktën t’ia kujtojë këtë “Maliqit”? T’i kujtojë se po shkel me të dyja këmbët ligjin? Ti tregojë se pavarësisht se “Maliq” i gjithëpushtetshëm dhe pa opozitë përballë, pikërisht se është “Maliqi” ynë duhet t’i respektojë i pari ligjet e këtij vendi?
Natysrisht që ka! Ose më saktë, teorikisht ka! Është KQZ- Komisioni Qendror i Zgjedhjeve. Ai ka të gjithë tagrat e detyrimet kushtetuese- ligjore të ngrejë problemin dhe të vendosë edhe sanksione për shkeljet që konstaton. Pikërisht ashtu siç paralajmëron mediat para, gjatë dhe pas fushatës, vetë si KQZ apo me ndihmën e AMA-s. Ashtu siç ka vendosur dhe vazhdon të vendosë gjoba të majme edhe për mediat vendore. Praktikisht, është e pamundur të ndërhyjë KQZ-ja. Kryetari Klement Zguri e di se e ka “pas veshi” shkarkimin nga Edi Rama, nëse i teket. Aq më shumë kur Zguri erdhi në krye falë marrëveshjes Rama- Basha të majit 2017, duke spostuar Denar Bibën, i cili natyrisht nuk mund të bëjë zë.
Mund t’ju duket e çuditshme, por me këto veprime, “Maliqi” është në njëfarësoj “mosbindje civile”, ashtu siç edhe vetë KQZ-ja. “Maliqi” e di se po shkel ligjin me të dyja këmbët, por vazhdon pa ndërprerje. KQZ e di se nuk po kërkon të zbatohet ligji dhe ta zbatojë për vete, por mbyll të dy sytë. Natyrisht, edhe opozita është në të njëjtën linjë, atë të “mosbindjes civile”, duke nisur nga dita e djegies së mandateve. E çfarë mund të dhe duhet të mendojnë apo të bëjnë shqiptarët përballë një shteti rrumpallë, gërmadhë e pashembur si ky që po perjetojmë sot…!? /Nga Blerti DELIJA/
