Matko Djarmati zbërthen planin e Vllaznisë për merkaton e janarit. Në një intervistë ekskluzive për “Panorama Sport”, drejtori sportiv i kuqebluve komentoi strategjinë që do të ndjekë klubi gjatë këtij muaji, teksa aktualisht është zyrtarizuar vetëm afrimi i mesfushorit francez, Mikel Panos. Kroati sqaroi edhe të ardhmen e sulmuesit Mehdi Çoba, ndërsa tregoi kërkesat e trajnerit Tomas Brdariç.
Matko, deri tani keni afruar vetëm një lojtar pas hapjes së merkatos. Cilat janë planet tuaja për këtë periudhë transferimesh?
Po, kemi afruar vetëm Mikel Panos, i cili është një lojtar që bën 2-3 pozicione në mbrojtje dhe mesfushë. Unë besoj shumë se do të rritet konkurrenca veçanërisht në mesfushë. Plani i merkatos te Vllaznia është i lidhur ngushtë me largimet nga klubi ynë.
Çfarë doni të thoni me këtë?
Nëse realizojmë ndonjë transferim jashtë Shqipërisë, do të reagojmë direkt për ta kompensuar. Pra, do të afrojmë lojtarë nëse arrijmë të shesim ndonjë prej tyre gjatë muajit janar. Më duhet të konfirmojë se interesi nga klubet e huaja për blerjen e kartonit të lojtarëve të Vllaznisë ekziston, por deri më tani nuk kemi diçka konkrete.
Sa besoni se mund të fitoni titullin këtë sezon?
Ndeshja e parë e vitit 2022 është kundër Tiranës dhe ky është një shans i madh për ne, që të ulim diferencën e pikëve me kryesuesit. Duke filluar nga unë dhe çdo lojtar i Vllaznisë, besojmë se do ta kapim Tiranën. Deri në fund të kampionatit ka edhe 63 pikë në lojë, pra nuk ka kaluar as gjysma. Kemi kohën e duhur për të kapur kreun.
