27 nëntor 2020, dita që mund të shënjojë të sotmen dhe të nesermen e Vllaznisë së futbollit…

E premtja e kësaj jave, pra data 27 nëntor, pritet të jetë një nga ditët më të shënuar për Vllazninë e këtyre 9 viteve tëfundit. Vërtetë në Shkodër janë të gjithë të gëzuar pas asaj fitoreje 3-2 ndaj Tiranës, por lajmi që do të marrin pas tre ditësh mund t’i kënaqë edhe më shumë.


Kjo sepse pikërisht të premten pritet të aprovohet nga Këshilli Bashkiak Shkodër nisja e procedurave të privatizimit të Klubit të Futbollit Vllaznia, gjë që është kërkuar prej kohësh nga të gjithë faktorët dhe që konsiderohet zgjidhja e vetme për një të ardhme më të mirë të këtij klubi dhe të futbollit shkodran.

Kështu nga sa ka bërë të ditur vetë Këshilli Bashkiak Shkodër, të premten më datë 27 nëntor ora 17:00 do të zhvillohet mbledhja e rradhës e tij dhe pika 5 e rendit të ditës është: “P/vendim për dhënien e pëlqimit për shitjen me ankand të aksioneve të Klubit të Futbollit Vllaznia sh.a në masën 100 %”.

Nga sa bëhet e ditur edhe vetë ky organ është dakord me një gjë të tillë, pasi ka bërë edhe konsultimet publike me qytetarët shkodranë të cilët padyshim që duan ta shohin sa më mirë skuadrën e tyre të zemrës.

“Në momentin që flasim jemi në prag të një vendimmarrjeje të rëndësishme. Të premten kemi gati projektvendimin për nxjerrjen në shitje. Kështu i hapet rruga konkurrimit. Nëse ndodh, në dhjetor hapim konkurrimin direkt për privatizimin. Nëse bashkohen fuqitë, impakti është më i madh, angazhohen më shumë njerëz dhe arrihen rezultate”- ka thënë mbrëmë në një studio televizive kryebashkiakja Ademi.

ShkodraWeb Channel
ShkodraWeb Channel