ZYRTARE – Vllaznia luan direkt në turin e dytë të Conference League, lajm i mirë edhe për financat e klubit kuqeblu

Në turin e parë apo në turin e dytë të Conference League? Kjo pyetje bëhej për Vllazninë, akoma pa siguruar pjesëmarrjen që erdhi përmes fitimit të Kupës së Shqipërisë në ndeshjen me Laçin. Por dilemat tashmë duket se kanë marrë fund zyrtarisht.

“Është zyrtare: Vllaznia do ta nisë rrugëtimin e saj nga turi i dytë i “Europa Conference League”. Dilemat kanë marrë fund me njoftimin që sapo kemi marrë nga Federata Shqiptare e Futbollit.


Bashkëngjitur është edhe dokumenti që institucioni i futbollit shqiptar ka marrë sot nga UEFA ku Vllaznia si fitures e Kupës dhe që përfaqëson Shqipërinë e cila është e renditur në vendin e 41-të, do të kalojë në turin e dytë të këtij kompeticioni, ndeshjet e të cilit do të luhen në datat 21 dhe 28 korrik.”, bëhet e ditur në portalin zyrtar të KF Vllaznia sh.a.

Ky lajm zyrtar është mjaft i mirë për kuqeblutë edhe në aspektin financiar. Sipas përllogaritjeve, akoma pa luajtur asnjë ndeshje në Conference League, Vllaznia ka të garantuara 450 mijë euro përfitime nga UEFA, të cilat mund të shtohen me rezultate pozitive apo edhe me kalim turi. Këtyre u duhen shtuar edhe 50 mln lekë të vjetra si premio nga FSHF për fitimin e Kupës së Shqipërisë.