Para pak minutave janë mësuar emrat e dy kandidatëve për kryetar të degës së PD- së Shkodër. Vetëm pak orë para orarit kur ishte paralajmëruar votimi, Lulzim Basha ka zyrtarizuar emrat e rivalëve. Ata janë Ramiz Çoba dhe Xhevdet Amuli. I pari është kryetari aktual, ndërsa i dyti biznesmen, ish- antar i Këshillit Bashkiak Shkodër dhe mbështetës i PD-së.
Ndërkohë, mësohet se zgjedhjet do të zhvillohen nesër, të shtunën, ora 10.30 në kinema “Millennium”. Zhvillimi i tyre brenda pak orëve, vë në pozitë jo të favorshme Amulin, kjo për shkak të kohës së pakët në dispozicion të rivalit, meqenëse Çobaj është kryetar në detyrë, ka ndjekur të gjitha zgjedhjet në grupseksione dhe është antar i grupit të punës për riorganizimin e degës së Shkodrës. Në këto kushte, kur kanë mbetur vetëm pak orë nga votimi, Amuli është dukshëm i disfavorizuar në garë. Në këto kushte, fituesi nuk është vështirë të parashikohet.
Kush ka të drejtë të votojë:
Delegatë në Kuvend sipas statutit të PDSH-së janë:
-Kryetarët dhe Sekretarët e Seksioneve.
-Sekretarët e Grupseksioneve (në detyrë).
-Kryetarët e Grupseksioneve.
-Anëtarët e Kryesisë, të zgjedhur dhe të koouptuar (në detyrë).
-Këshilltarët bashkiakë, përfaqësues të PD-së.
-5% të delegatëve nga LDG.
-5% të delegatëve nga FRPD.
Sipas burimeve nga selia e PD Shkodër, në total numri i atyre që kanë të drejtë të votojnë për kryetarin e ri të degës, është rreth 350 vetë.
