Shkodra ka organizuar sonte një protestë të heshtur në përkujtim të të riut Klodian Rashaj, i cili u ekzekutua në orët e para të ditës së sotme nga një punonjsë policie. Organizimi i protestës është bërë përmes rrjeteve sociale brenda një kohe të shkurtër. Ndërsa ora po shënonte 22.00, kur niste edhe “ora policore”, në sheshin qendror të qytetit, pranë bustit të Luigj Gurakuqit, janë tubuar disa dhjetra qytetarë.
Pasi janë tubuar, ata kanë marshuar në drejtim të ndërtesës së Prefekturës së Qarkut Shkodër. Tubimi ka qenë nën monitorimin e mediave por edhe të policisë. Disa makina policie kanë kaliar edhe pranë protestuesve, por nuk janë ndalur për të vendosur gjoba, ashtu siç e parashikon VKM- ja për shkeljen e “orës policore”.
Para derës së Prefektuesë, protestuesit e heshtur, kanë vendosur qirinjtë e ndezur të cilët i mbanin në duar. Pasi kanë qëndruar disa minuta aty, pjesëmarrësit janë shpërndarë pa patur asnjë problem. Ndërkohë, asnjë nga ata që ishin në protestë, nuk kanë pranuar të flasin për mediat, duke e përcjellë mesazhin e tyre përmes heshtjes.
Në rrjete sociale, u shpreh gatishmëria për pjesëmarrje nga të paktën 300 persona. Në shesh, ky numër ishte shumë më i reduktuar, më modest por që nuk e zbehu aspak mesazhin që u përcoll edhe përmes heshtjes dhe në “shkelje” të “orës policore”. Pritet që nga nesër, protesta të ngjashme të zhvillohen edhe në qytete të tjera të vendit. Protesta është transmetuar “live” në Facebook nga SHWM. /ShkodraWeb Media/
