Jupp Heynckes e ka nisur më së miri aventurën e re në krye të Bayern Mynchen pas shkarkimit të Carlo Anchelotti-t. Tekniku gjerman ka kthyer te fitoret pas 2 ndeshjesh në “Bundesligë” kampionët në fuqi, duke mundur thellë në “Allianz Arena” 5-0 skuadrën e Freiburg.
Bavarezët nuk e vunë asnjëherë në dyshim fitoren pasi zhbllokuan rezultatin që në minutën e 8-të falë një autogoli të Schuster. Pak para përfundimit të pjesës së parë Kingsley Coman dyfishoi shifrat me kokë.
Në pjesën e dytë fillimisht Thiago Alcantara, më pas Lewandovski dhe në fund Kimmich stampuan shifrat përfundimtare të takimit. Në këtë ndeshje mesfushori shqiptar i Freiburg nuk luajti për asnjë minutë për shkak të dëmtimit.
Pas 8 ndeshjesh në “Bundesligë” Bayern Mynchen renditet në vendin e 2-të me 17-të pikë, 2 më pak se Dortmund-i i vendit të parë që luan në orën 18:30 kundër Leipzig sfidën e kësaj jave. /balkanweb/
