Nënkryetarët e Partisë Demokratike dhe Sekretari i Përgjithshëm kanë reaguar pas deklaratave të Sali Berishës, i cili u kërkoi atyre që të japin dorëheqjen, pasi sipas tij janë emëruar dhe nuk janë zgjedhur.
Në reagim thuhet se ish-kryeministri ka nisur një fushatë të padenjë sulmesh, ndërsa thonë se ai nuk ka asnjë lidhje me PD dhe demokratët.
Ata thonë se secili prej nesh është i vendosur të refuzojë shkeljen e Statutit për interesa personale të Sali Berishës dhe izolimin e Partisë Demokratike.
Zyrtarët e lartë drejtues të Partisë Demokratike sqarojnë se asnjë intimidim nuk do të ndikojë në qëndrimet e tyre në krah të demokratëve.
“Prej disa ditëve, për shkak të qëndrimit tonë në mbrojtje të demokratëve dhe interesit të Partisë Demokratike, z. Sali Berisha ka nisur një fushatë të padenjë sulmesh ndaj Nënkryetarëve dhe Sekretarit të Përgjithshëm të PD. Me keqardhje, përsëritet kërkesa që ne duhet të braktisim Partinë Demokratike dhe demokratët, dhe të bëhemi bashkë me Sali Berishën kundër partisë.
Secili prej nesh është i vendosur të refuzojë shkeljen e Statutit për interesa personale të Sali Berishës dhe izolimin e Partisë Demokratike. Kërkesa e z. Berisha nuk ka asnjë lidhje me PD, asnjë lidhje me standartet demokratike, asnjë lidhje me hallet dhe problemet e demokratëve. Demokratët kanë 8 vite që përballen me dhunën dhe terrorin e Edi Ramës, me krimin dhe bandat e tij dhe nuk jemi sprapsur as kthyer nga rruga për t’i shërbyer Shqipërisë dhe shqiptarëve. Ne e kemi për detyrë të jeni krah tyre.
Asnjë intimidim nuk do të ndikojë në qëndrimin tonë në krah të demokratëve, për një parti që u shërben atyre dhe jo që kthehet në mburojë të interesave personale të Sali Berishës, aleatëve të tij dhe cilitdo tjetër”, thuhet në reagim.
PO CFARE DEKLAROI SOT SALI BERISHA?
Ish-kryeministri u bëri thirrje nënkryetarëve dhe Sekretarit të Përgjithshëm të PD-se qe te japin dorëheqjen, pasi sipas tij ata nuk jane zgjedhur sipas statutit, por janë emëruar nga Basha.
“Jam këtu për t’i bërë thirrje çdo anëtari kryesie. Unë nuk personalisht asgjë me asnjërin. Ju them se ju jeni të rinj në politikë dhe duhet të korrigjoni qëndrimin tuja. Në politikë edhe gabohet, por e rëndësishme është që njeriu korrigjon gabimin.
Nuk jeni të zgjedhur konform statutit por jeni të emëruar nga Lulzim Basha. Sa më shpejt jepni dorëheqjen, bashkohuni me kuvendin rithemelues të PD-së. Bashkohuni sepse qëllimi ynë është të bashkohemi. Vota mund të na bashkojë ne si njerëz të qytetëruar dhe që vendosim të zhvillojmë vlerat e përbashkët. Edhe njëherë i deklaroj sekretarit të përgjithshëm, nënkryetarëve të PD dhe anëtarëve të tjerë të emëruar, jepni dorëheqjen menjëherë, mos rrini si skllevër sepse do bëni një gabim të rëndë”, tha Berisha nga foltorja me demokratet ne Burrel.