Vllaznia pret vetëm nisjen e sezonit të ri të Superligës për tu rikthyer aty. Edhe Besëlidhja “ngec” në “Loro Boriçin” e Shkodrës. Trajneri i ri Agim Canaj starton aventurën e tij të tretë në Shkodër me një fitore. Madje ndaj një ekipi që në vigjilje, pavarësisht nuk nuk lufton për asgjë, kishte paralajmëruar rezistencë të fortë ndaj shkodranëve. E në fakt, pjesa e parë, pavarësisht rasteve që u shperdoruan nga kuqeblutë, u mbyll me rrjeta të paprekura. Në pjesën e dytë, do të duhej të ngjitej në katedër brazliani Zhunior. Në minutën e 53-të, pas një krosi nga krahu i djathtë i sulmit kuqeblu, me një rofeshatë akrobatike braziliani dërgon topin në rrjetë me portierin lezhjan Bajri që vetëm e shoqëron me sy.
Loja e Vllaznisë vazhdon të jetë në rritje, me mjaft raste për të shënuar që konkretizohen në minutën e 63-të. Përsëri një top nga krahu i djathtë i sulmit të Vllaznisë dhe këtë herë, është rradha e Dan Ignat për të përshendetur rrjetën e Besëlidhjes. Rumuni shfrytëzon kështu shtatlartësinë e tij për të shënuar golin e sigurisë.
Në minutën e 80-të do të ishte rradha e Arsid Krujës për të hipotekuar fitoren e merituar të Vllaznisë. Një kundërsulm i nisur nga Krymi, një pasim tek Hajdari dhe ky tek Kruja që mposhtë Bajrin për herë të tretë. Minutat e mbetura i dhanë mundësinë edhe Arsen Hajdarit të shënonte një supergol. Pas një krosimi nga krahu i djathtë nga Zhunior, në zonën e rreptësisë Hajdari e ndal bukur me gjoks dhe “a volio” e godet duke e dërguar pas shpinës së porterit lezhjan.
I gjithë takimi do të mbyllej me këtë rezultat, i cili thuajse zyrtarizon ngjitjen e Vllaznisë në Superligë, edhe pse për “matematikën” duhet të presim edhe pak ditë. Takimi ka nisur me një minutë heshtje për ndarjen nga jeta të ish- futbollistët të Tiranës, por edhe Vllaznisë dhe ekipit tonë kombëtar, Ali Memës.
