Ditën e sotme, Liqeni i Shkodrës por edhe lumi Buna, kanë patur “mysafir” të veçantë. Gondolat veneciane, varkat tradicionale të Venecias, për herë të parë kanë lundruar në ujrat që rrethojnë Shkodrës.
Lidhjet e kahershme të Shkodrës me Venecian, duket si u kthyen në kohën kur ato lulëzonin, duke ofruar pamje që vertetë lënë përshtypje për të gjithë, shqiptarë por edhe italianë.
Në këto aktivitete, ishte i pranishëm edhe kryebashkiaku i Shkodrës Bardh Spahia, i cili përveç një teksti të shkurtër rrëfyes, ka publikuar edhe fotot vertetë të rralla.
“Shkodra dhe Venezia janë dy rajone me lidhje që datojnë shekuj më parë.
Sa herë flitet për historinë e qytetit tonë, është e pamundur të mos ndalemi tek ky fakt. E natyrshme kur këto lidhje mbeten ende të forta dhe ka pika takimi, si në ekonomi, art apo turizëm, kënaqësia shtohet.
I tillë ishte edhe rasti i fundit ku pata privilegjin të prisja në brigjet e Shirokës, pas një udhëtimi fantastik me Gondolat Veneziane në ujërat e liqenit të Shkodrës, miqtë e “Associazione Settemari Asd, Aps di Venezia”. Ata janë intelektual të fushave të ndryshme por që i bashkon një pasion.
Nuk kishte si të bëhej më i bukur promovimi turistik i Shkodrës, sesa në këtë formë, ndërsa i ftova miqtë nga Venecia të rikthehen për të eksploruar të tjera mrekulli të bashkisë tonë.”, shkruan kryebashkiaku Spahia në publikimin e tij në Facebook.
