Një tentativë për grabitje mbrëmjen e sotme në Kamëz i ka marrë jetën pronarit të një mini-marketi, ndërsa ka mbetur e plagosur edhe bashkëshortja e tij. Çifti Agim dhe Merita Buci, me origjinë nga Burreli, kanë qenë në dyqan kur dy grabitës janë futur dhe i kanë kërcënuar me armë, por kur kanë hasur në rezistencën e tyre, i kanë qëlluar.
52 vjeçari ka marrë një plumb në gjoks dhe ka ndërruar jetë rrugës për në spital, ndërsa bashkëshortja e tij është plagosur në këmbë. Në dyqan në momentet e ngjarjes ka qenë edhe djali i tyre 6 vjeçar i cili u ka shpëtuar mrekullisht plumbave.
Ndërkohë grabitësit janë filmuar nga kamerat e sigurisë së dyqanit të pronarëve, dhe mësohet se janë larguar me një “BMW” ngjyrë të zezë. Çifti Buci prej 17 vitesh jetojnë në Tiranë, dhe janë prindër të një djali dhe tre vajzave, dy prej të cilave janë të martuara dhe jetojnë në Itali.
