Bashkëshortja e këshilltarit të ish ministrit të ndjerë të Ekonomisë Dritan Prifti, Ilirjana Belegu ka kërkuar që bashkëshorti i saj, Eduart Belegu të shpallet i vdekur pas zhdukjes në mënyrë misterioze te tij 8 vite me parë.
Ilirjana Belegu i është drejtuar më një kërkesë Gjykatës së Tiranës, kërkesë që është publikuar edhe në Fletoren Zyrtare.
“Shtetasja Ilirjana Belegu, e datëlindjes 2.7.1969, kërkon pranë Gjykatës së Rrethit Gjyqësor. Tiranë, shpalljen të vdekur të shtetasit Eduart Belegu, i datëlindjes 21.2.1963”, thuhet në kërkesë.
Belegu u zhduk në mars të vitit 2010, një muaj pas lirimit të tij nga qelia ku u mbajt për akuzën e vjedhjes duke shpërdoruar detyrën. Belegu që u arrestua teksa mbante detyrën e këshilltarit të ministrit të Ekonomisë, u pa për herë të fundit në zonën pranë Pallatit të Sportit “Asllan Rusi” në Tiranë.
Ditën e zhdukjes, ai kishte planifikuar një takim me një biznesmen për një punë borxhi, por pas takimit u zhduk në mënyrë të befasishme. Hetimet nuk kanë zbuluar asgjë deri më tani rreth zhdukjes së tij.