Partia Demokratike po përgatitet fuqishëm për protestën e 27 janarit në Tiranë. Ndërsa kryetari i degës demokrate të Shkodrës Ramiz Çoba pas zgjedhjeve të 25 qershorit e ka ulur dukshëm aktivitetin politik, “frenat” në dorë duket se i kanë marrë deputetët demokratë të qarkut. Nisur nga postimet në Facebook, duket se me aktivët janë Izmira Ulqinaku dhe Romeo Gurakuqi. Vetëm tre ditët e fundit, ata kanë organizuar takime me grupseksionet e PD-së në Rrethina, Postribë dhe Ana e Malit. Nga postimet e shpërndara në profilin në Facebook të deputetes Ulqinaku, përcillet optimizëm dhe përkrahje për nismën e opozitës.
Me 27 janar kryetari Lulzim Basha ka njoftuar një protestë të madhe kundër qeverisë Rama në sheshin para Kryeministrisë në Tiranë. Për herë të parë, në krah të PD-së do të jetë edhe LSI, e cila 4 vitet e shkuara ishte në bashkëqeverisje me PS-në dhe Edi Ramën, ndërsa nga 25 qershori është në opozitë.