Drejtori i Administrimit të Zonave të Mbrojtura në Lezhë Pjetër Toni dhe 2 vartësit e tij të arrestuar në muajin qershor me akuzën e “Shpërdorimit të detyres” do të hetohen në gjendje të lire. Gjykata e Lezhës ndryshoi masën e sigurisë nga “arrest shtëpie” në “detyrim paraqitje”, për drejorin e ADZM Pjetër Toni, si dhe liroi nga qelia dy punonjësit e këtij institucioni Armando Lleshaj, 27 vjeç specialist monitorimi dhe Tom Gjelaj, 63 vjeç, roje mjedisore, duke vendosur ndaj tyre masen detyrim paraqitje.
Vendimi është dhënë nga gjyqtari Artan Hajredinaj, i cili pranoi kërkesën e palës mbrojtëse për një masë më të butë ndaj tre zyrtareve të vënë nën akuzë, me argumentin se nuk përbëjnë rrezik largimi dhe prishje të provave. Hetimet në lidhje me rastin nisen bazuar në informacionet e siguruara se në zonën e mbrojtur “Laguna Kune-Vain” po kryhej veprimtari e paligjshme”.
Sipas prokurorisë 3 zyrtaret e ADZM nuk kanë përmbushur detyrat funksionale dhe kishin lejuar “dëmtimin e zonës së mbrojtur të Kune – Vainit”, konkretisht në vendin e quajtur “Grykëderdhja e Matkeqës”.
Hetimi ka provuar se në zonën e mbrojtur janë hedhur inerte për ta kthyer atë në tokë dhe po ashtu ka pasur përpjekje për tjetërsimin e saj. Gjithashtu Policia e Lezhës procedoi penalisht në nëntor të vitit që shkoi tre persona për hedhje të inerteve në lagunë.