Pesë persona janë shpallur në kërkim nga Prokuroria e Krimeve të Rënda me akuzën se kanë qenë pjesë e grupit të trafikut të drogës të njohur me emrin “banda e Vilunit”. Urdhrat e arrestit për këta shtetas janë firmosur disa javë më parë nga Prokuroria e Krimeve të Rënda dhe janë lënë në fuqi nga Gjykata e Shkallës së Parë, ndërsa këtë fundjavë janë marrë në shqyrtim e aprovuar edhe nga Apeli. Bëhet fjalë për pesë persona, të cilët janë shpallur në kërkim nga ana e prokurorisë, pasi rezultojnë të implikuar në role e detyra të ndryshme në grupin e goditur fillimisht gjatë aksionit “Laguna e Vilunit”. Grupi në fjalë mësohet se ka grumbulluar sasi të mëdha droge nga zona të ndryshme të Shqipërisë dhe më pas i ka trafikuar në drejtim të Italisë, shkruan Panorama.
Në ditët e para të qershorit 2017, Prokuroria e Krimeve të Rënda urdhëroi arrestimin e shtetasve Andera (Renato) Çaushi, i cili u kap në një automjet të blinduar në të njëjtin aksion, ku u prangosën dhe Andrea Mita, Kasem Pilurin, Altin Rramolli, të akuzuar në vazhdim të procedimit të nisur gjatë aksionit “Laguna e Vilunit”. Pa kaluar një muaj nga ky aksion, gjykata liroi Renato Çaushin, ndërsa të tjerët u lanë në burg. Pesë bashkëpunëtorë të tyre janë ndërko hë në kërkim pasi ende nuk janë gjetur.
NGARKESAT ME DROGË
“Ka rezultuar se më datë 02.04.2014, autoritetet italiane kanë sekuestruar në peshkarexhën “M.P.Gianmarco”, rreth 12 metra të gjatë, sasinë prej 2.062 kg, lëndë narkotike kanabis sativa. Janë arrestuar 8 shtetas italianë, të gjithë me precedentë penalë. Sipas këtij informacioni, peshkarexha është nisur nga brigjet italiane të Sicilisë në orët e para të datës 29.03.2014 në drejtim të brigjeve greke, ku mendohet të jetë kryer edhe ngarkimi i lëndës narkotike.
Rreth orës 2300 të datës 01.04.2014, janë arrestuar personat e sipërpërmendur, të cilët do ta transportonin lëndën narkotike nga bregdeti në një vend të sigurt, me një kamion “Fiat Iveco”, bëhet me dije nga organi i akuzës. Sipas saj, rezulton se ngarkesa mund të jetë për llogari të shtetasit Kasëm P. (baxhanaku i shtetasit Mikel H. Kjo ngarkese dyshohet se është nisur nga zona e Vilunit me skaf në drejtim të Greqisë dhe, në ujë, është bërë kalimi i ngarkesës nga skafi te peshkarexha).
Po kështu, më datë 21.05.2014, nga autoritetet italiane në Katania, Itali, është ndaluar peshkarexha e quajtur “Arizona”, në brendësi të së cilës është gjetur dhe sekuestruar një sasi prej 1.5 tonë lëndë narkotike kanabis sativa. Lidhur me këtë ngjarje, janë arrestuar 3 shtetas italianë, pjesëtarë të e ekuipazhit të peshkarexhës. Ngarkesa me lëndë narkotike ka ndjekur itinerarin Shqipëri-Greqi-Itali.
