Një 45-vjeçar nga Kukësi ka rënë preh e një sulmi nga një kafshë e egër, Arushë.
Fatmirësisht, ai ka shpëtuar, ndonëse është ndeshur me kafshën e egër, e cila e ka plagosur në gjymtyrët e sipërme.
Babai i 5-fëmijëve në një rrëfim për Channel One, thotë se ka përjetuar moment vërtetë të frikshme, por falë ndihmës që i ka dhënë qeni i tufës së bagëtive, ai ka arritur të mbijetojë. Banorët e fshatit ku ka ndodhur ngjarja, thonë se kafshët e egra janë shtuar shumë, pas moratoriumit të gjuetisë, duke u kthyer në problem serioz për jetën e tyre, kulturat bujqësore, por edhe bagëtitë që mbarështojnë.
Një 45-vjeçar nga fshati Fshat i Njësisë Administrative Grykë-Çajë në Kukës është sulmuar nga një arushë, teksa ka qenë duke kullotur tufën e bagëtive në mal.
Ngjarja ka ndodhur rreth mesditës së një dite më parë, ku siç rrëfen Fasliu, arusha e ka ndjekur nga pas, duke bërë që ai të ndeshet me të, ndonëse frika ka qenë e madhe dhe ai është plagosur në gjymtyrët e sipërme.
Edhe banorët e tjerë të fshatit thonë se kafshët e egra janë shtuar shumë kohëve të fundit, ku moratorium i gjuetisë, duket se ka ndikuar për shumimin e tyre. Megjithatë, ata thonë se të tilla kafshë kanë filluar të kthehen në shqetësim, sa kohë që po dëmtojnë kulturat bujqësore, por edhe tufat e bagëtive.
Në fshatrat e thellë të qarkut të Kukësit, kafshët e egra si ujku, ariu, dhelpra etj janë të shumtë, ku banorët e zonës prej kohësh i kanë dhënë fund edhe gjuetisë pa kriter, duke krijuar një klimë të favorshme për shtimin e tyre.
