Detaje të reja dalin nga aksidenti fatal ku humbën jetën dy gra në Kryebushat të Shkodrës. Policia ka zbardhur dinamikën e ngjarjes duke evidentuar edhe përgjegjesit. Nga kqyrja e vendit të ngjarjes, rezulton se makina ku udhëtonin gratë, është goditur me forcë nga pas nga një makinë që sipas policisë, lëvizte me shpejtësi shumë të madhe pertej normale të lejuara. Përplasja ka rezultuar fatale për dy gratë që kanë ndërruar jetë menjëherë, ndërsa një grua tjetër që ishte në sediljen e pasme të makinës bashkë me ta, është në gjende të rëndë në spital.
Pas hetimeve të para, uniformta blu të Shkodrës kanë vënë në pranga Jak Përjakun 28 vjeç, i cili drejtonte makinën që goditi Audin ku udhëtonin dy gratë që humbën jetën. Lëvizja me shpejtësi përtej normave të lejuara, ka qenë shkaku i përplasjes fatale dhe humbjes së jetës së dy grave. Njëra nga gratë ishte mësuese dhe lë pas një fëmijë të mitur 8- vjeçar, ndërsa gruaja tjetër raportohet se është murgeshë. Ndërsa 5 persona të tjerë, mes tyre edhe Përjaku mbetën të plagosur nga aksidenti. /ShkodraWeb/
