“Zyrtarizoi koalicionin ‘Shtëpia e Ilirit’”, PD-ja zyrtare reagon pas regjistrimit në KQZ të “Shtëpia e Lirisë”: Demokratët nuk i lidh asgjë me të

Sekretari i Përgjithshëm i PD, Gazment Bardhi ka reaguar pas vendimit të marrë nga Komisioni Qendror i Zgjedhjeve, që regjistroi koalicionin “Shtëpia e Lirisë”, të përbërë nga LSI dhe PDK, por jo grupimin e Sali Berishës në zgjedhjet e pjesshme vendore të 6 marsit.

Në një postim në rrjetet sociale, Bardhi shkruan se KQZ “zyrtarizoi koalicionin “Shtëpia e Ilirit”, me parti përbërëse vetëm LSI e Monika Kryemadhit dhe PDK e Nard Ndokës. Demokratët nuk i lidh asgjë me “Shtëpinë e Ilirit”.


“Koha ku demokratët strehoheshin në “Shtëpinë e Ilirit”, për interesa të rritjes së pazarit të tij me Edi Ramën ka përfunduar! Koha që nëpërmjet rritjes së LSI me demokratë të dhënë borxh, t’i shërbehet pushtetit të Edi Ramës ka përfunduar. Partia Demokratike është shtëpia e vetme e demokratëve”, shkruan Bardhi.

Reagim i Sekretarit të Përgjithshëm të PD, Gazment Bardhi.

Përtej çdo makinacioni dhe mashtrimi politik, në 6 Mars ka vetëm një Parti Demokratike në zgjedhje. KQZ sapo zyrtarizoi koalicionin “Shtëpia e Ilirit”, me parti përbërëse vetëm LSI e Monika Kryemadhit dhe PDK e Nard Ndokës. Demokratët nuk i lidh asgjë me “Shtëpinë e Ilirit”.

Koha ku demokratët strehoheshin në “Shtëpinë e Ilirit”, për interesa të rritjes së pazarit të tij me Edi Ramën ka përfunduar! Koha që nëpërmjet rritjes së LSI me demokratë të dhënë borxh, t’i shërbehet pushtetit të Edi Ramës ka përfunduar. Partia Demokratike është shtëpia e vetme e demokratëve.