Elvis Plori ka lënë stafin e Mirel Josës për të zënë një tjetër pozicion në klubin e Vllaznisë. Pas dy viteve në rolin e zëvendës trajnerit si dhe për një periudhë të shkurtër i gjendur edhe si trajneri i Vllaznisë, shkodrani do të largohet nga ekipi i parë i kuqebluve.
Tashmë Plori do të jetë trajneri i ri i skuadrës Vllaznia u-21. Ish-trajnerit të ekipit të parë të shkodranëve i është besuar posti i skuadrës së 21-vjeçarëve dhe njëkohësisht do të marrë edhe një detyrë të re si promovues i talenteve të akademisë kuqeblu. Këtë lajm e ka bërë me dije vetë akademia e Vllaznisë me anë të një statusi në profilin e saj në rrjetin social “facebook” duke njoftuar se nga e mërkura e ardhshme, Plori do të nisë këtë aventurë të re.
“ZYRTARE
KF Vllaznia bën të ditur se ka emëruar z. Elvis Plori në postin e trajnerit të ekipit U21. Njëkohësisht ai do të kryejë edhe detyrën e promovuesit të talenteve të Akademisë tonë.
Plori do të nisë punën me ekipin U21 nga e mërkura e ardhshme dhe ne i urojmë suksese në detyrën e tij të re!” shkruhej në komunikatën e Akademisë së Vllaznisë
Më datë 15 maj, Vllaznia vendosi të mbyllte bashkëpunimin me trajnerin Elvis Plori për të emëruar në krye të skuadrës trajnerin Mirel Josa. Plori mori drejtimin e skuadrës shkodrane më 15 mars, duke zëvendësuar Thomas Brdaric ku qëndroi në krye të Vllaznisë për 11 ndeshje.