ZYRTARE – Bardh Spahia emri i dytë si kandidat për Bashkinë e Shkodrës me 6 mars, fitoi “primaret” demokrate…

Bardh Spahia është kandidati i dytë për kryetar të Bashkisë së Shkodrës. Emri i tij ka dalë pas votimit në “primare” të organizuara nga Komisioni i Rithemelimit të PD- së, si fazë e parë e përzgjedhjes së emrit që do të garojë me 6 mars 2022 në zgjedhje të pjesshme vendore të shpallura nga presidenti Meta.

Spahia doli i pari në një listë me 6 kandidatura dhe konkretisht: Astrit Bushati, Alfred Koçobashi, Arben Maliqi, Irma Kopliku Alushi dhe Irena Shestani Shala. Spahia arriti të marrë shumicën dërrmuese të votave të anëtarëve, 1011 vota nga 1508 votues  (67%) dhe konkretisht:


Bardh Spahia 1011 vota
Irena Shestani Shala 295 vota
Astrit Bushati 201 vota
Irma Alushi Kopliku 49 vota
E pavlefshme 1 votë

Ditën e sotme, demokratët në zotërim të një karte antarësie të PD- së, kanë patur mundësi të votojnë për kandidatin për kryebashkiak të Shkodrës në tre qendra: Në Pallatin e Sportit “Qazim Dervishi”, Berdicë dhe Rrethina. Spahia ka dalë fitues në të tre këto qendra.

“Primaret” u futën në Statutin e miratuar nga Kuvendi Kombëtar i 11 dhjetor 2021, duke shënuar një risi jo vetëm për PD- në por edhe partitë politike shqiptare. Kandidatët për deputetë, për kryebashkiakë, për keëshilltarë bashkiakë, madje edhe kandidati për kryeministër i PD- së, do të zgjidhen përmes “primareve”, ka qenë premtimi edhe i sotëm i ish- kryeministrit Berisha në “Foltoren” e Vau- Dejësit.

Bardh Spahia do të kandidojë përballë Majlinda Angonit të PS- së tashmë e zyrtarizuar, ndërsa pritet edhe shpallja e një kandidati tjetër nga PD-ja zyrtare e Bashës por edhe ndonjë kanditurë tjetër.

Ndërsa KQZ ka refuzuar regjistrimin e përfaqësuesve të Komisionit të Rithemelimit, duke njohur si subjekt zgjedhor PD- në me kryetar Lulzim Bashën, pritet të shihet si do të kandidojnë kandidatët e dalë nga “primaret”.

Duket se dalja si të pavarur po zbehet, teksa pritet që të hënën apo të martën, të prezantohet një koalicion partishë opozitare të djathta, me gjasë, edhe LSI-ja e cila është e vetmja që do të ketë nga një antar në të gjitha nivelet e administrimit të zgjedhjeve në 6 bashki të vendit. /ShkodraWeb/