Agim Canaj është rikthyer në Shqipëri pas një udhëtimi disa ditor për motive familjare në Angli. Menjëherë ai do të nisë punën në krye të ekipit kuqeblu për të përgatitur sa më mirë ndeshjen me Erzenin. Tekniku kuqeblu do të nisë stërvitjen sot në orën 15.00, duke patur në dispozicion të gjithë lojtarët.
Mediat gjatë këtyre ditëve, kanë hamendësuar shumë lidhur me rikthimin ose jo të Agim Canajt në krye të Vllaznisë, pas raportimeve mediatike për incidente gjatë stërvitjes. Gjithçka u la e hapur deri në kthimin e Canajt nga Anglia, ku ishte larguar për arsye familjare pasi kishte marrë leje në klub. Nga sot, puna do të rifillojë normalisht me synimin tashmë thuajse të arritur edhe matematikisht, ngjitjen në Superligë. Kjo është më e rëndësishmja dhe ajo që presin tifozët kuqeblu jo vetëm në Shkodër por edhe përtej saj. Ndërkohë, ish- trajneri Hasan Lika, trajneri aktual Agim Canaj dhe drejtori sportiv Engin Firat në fund të sezonit do të konsultojnë raportet e tyre, të cilat kanë një rëndësi të madhe për formimin e Vllaznisë së Superliges. Një ekipi, që siç ka thënë administratori Suad Lici, do të futet në garë për trofe dhe Kupat e Europës. /ShkodraWeb/
