Kryetarja e Grupit të Demokratëve, Rudina Hajdari i është përgjigjur sot kryeministrit Rama për sulmet që ai bëri ndaj drejtuesve të opozitës që janë jashtë Parlamentit. Hajdari ka thënë sot se Lulzim Basha, Monika Kryemadhi dhe Sali Berisha kanë patur abuzimet e tyre dhe për këtë arsye ata u ndëshkuan nga qytetarët me votë. Deputetja e larguar nga PD-ja ka thënë se zgjedhjet e shkuara ishin legjitime dhe se u firmosën nga PD dhe LSI-ja.
“Pse merreni me opozitën me Lulzim Bashën, Monika Kryemadhin dhe Sali Berishën?! Ata kanë pasur eksperiencën e tyre, kanë pasur problemet e tyre, kanë pasur abuzimet e tyre, shqiptarët nuk i kanë besuar dhe këtë e treguan zgjedhjet e kaluara, dhe ato ishin zgjedhjet legjitime. Ata firmosën dhe pas dy vitesh u kthyen këtu dhe thanë që zgjedhjet nuk ishin legjitime”, tha Hajdari.
Ndërkohë që Hajdari ka folur dhe për marrëveshjen e vitit 2008, kur tha qe me atë marrëveshje u shit Shqipëria.
“Në 2008 ju zotëri keni shitur Shqipërinë me marrëveshjen e 2008-ës. Mund të me thoni sipas asaj marrëveshje që erdhi si erdhi dhe e dini ju pse e bëtë, më thoni që ju në Parlament keni deputetë më të denjë seç kishit? Ju keni deputet që ju binden dhe qeshin pas batutave tuaja”, ka thënë ajo.
Më tej, në artikulimin e saj, Rudina Hajdari ka thënë se ishte kundër bojkotit.
“Unë jam kundër bojkotit, ne s’mund të shkojmë dot në zgjedhje duke bojkotuar. Nuk mundet të hedhim baltë mbi opozitën që është jashtë Parlamentit, pasi në mesin e tyre ka dhe qytetarë të ndershëm”, ka thënë ajo.
