Me 6 mars 2022, votohet në 6 bashki pas dekretit të shpallur nga presidenti Meta për zgjedhje vendore të pjesshme. Votimi për kryetarin e bashkisë, do të zhvillohet edhe në Shkodër, ku ka nisur puna për përfundimin me sukses të këtij procesi.
Sipas të dhënave të Gjendjes Civile, kanë të drejtë të marrin pjesë në votimin e 6 marsit 168.290 zgjedhës. Krahasuar me një vit më parë, me zgjedhjet politike të 25 prill 2021, janë 520 zgjedhës më shumë që janë shtuar.
Sipas KQZ- së, në territorin e Bashkisë së Shkodrës, do të jenë të hapura ditën e zgjedhjeve 250 qendra votimi. Nga këto, 141 qendra në qytetit dhe pjesa tjetër në njësitë administrative që janë në territorin e Bashkisë së Shkodrës.
Nga këto qendra votimi, 12 duhet të jenë funksionale në zona të konsideruara malore. Duhet parë nëse deri me 6 mars 2021, do të krijohen kushtet që banorët e atyre zonave, të ushtrojnë të drejtën e votës. Bëhet fjalë për mungesë energjie, natyrisht edhe interneti, teksa edhe aksesi është në kufijtë e të pamundurës për shkak të izolimit nga bora.
Ndërkohë, krahasuar edhe me zgjedhjet e 25 prillit 2021, Bashkia e Shkodrës do të ketë të njëjtin numër të KZAZ- ve. Kështu, do të ketë 4 KZAZ të vendosura në Pallatin e Sportit “Qaziom Dervishi”, në palestrën e shkollës “Ismail Qemali”, shkollës “Shejnaze Juka” dhe shkollës “Xheladin Fishta”.
Pa përfunsimit të votimit, në këto ambjente do të bëhet dorëzimi i kutive të numërimit për të vijuar më pas edhe me numërimin e votave dhe nxjerrjen e rezultateve të votimit. Siç dihet, zgjedhësit do të kenë në dorë vetëm një votë për zgjedhjet e kryetarit të Bashkisë, duke nënkuptuar se procesi i numërimit dhe shpalljes së rezultatit, do të jetë më i shpejtë. /ShkodraWeb/
