Deputetja e Shkodrës, njëkohësisht numri 2 i qeverisë “Rama 2”, nuk ka ndërmend të kandidojë për Bashkinë e Shkodrës në 2019- ën. Zëvëndëskryeministrja Senida Mesi në “360grade” i’u përgjigj pyetjes së moderatorit Artur Zheji për mundësinë e një kandidimi për kreun e Bashkisë së Shkodrës, në zgjedhjet e ardhshme lokale.
“Unë jam deputete e qarkut të Shkodrës dhe zv/kryeministre. Vij nga një eksperiencë e gjatë në sistemin privat dhe sigurisht kam bërë dhe ato politika të qeverisjes vendore në dy vite në Shkodër, por detyrat që kam janë shumë sfiduese dhe dua ti realizoj më së miri.
Jam një natyrë që kur marr një detyrë e marr me përgjegjësi maksimale. Shkodrës i shërbej më së miri edhe në pozicionin, ku jam aktualisht”, tha Mesi. Mbase deklarata e Mesit lidhet edhe me frymën aspak të mirë të marrëdhënieve me kolegun e saj Ditmir Bushati. Burime brenda PS-së Shkodër thonë se nga Krishtlindjen e kaluara, komunikimi në mes tyre është thuajse zero.
