Është bërë e mundur të zbardhet skemën e ekzekutimit në Lezhë të efektivit të FNSH-së , Xhulio Prela, i cili ishte duke udhëtuar më makinën e tij tip “Volkswagen” drejt Lezhës.
Mësohet se ai po kthehej nga aeroporti i Rinasit ku kishte dërguar disa të afërm, por gjatë udhëtimit në aksin Milot-Lezhë, një person i ka nxjerrë dorën dhe e ka ndaluar.
Më pas, në rrethana të paqarta akoma, ata janë konfliktuar mes tyre për arsye ende të panjohura. Pas konfliktit Prela ka hipur në makinë, por është qëlluar nga disa persona që ishin në një tjetër automjet.
Ai ka marrë një plumb në pjesën e gjoksit duke sjellë vdekjen e menjëhershme ndërsa janë gjetur në vendngjarje tre gëzhoja. Kjo ka bërë që makina të ecë pa drejtues për rreth 300 metra dhe më pas të dalë nga rruga.
Policia po heton në disa pista në lidhje me ekzekutimin e efektivit të FNSH-së Xhulio Prela mëngjesin e sotëm në aksin Milot-Lezhë.
Prela nuk njihej si problematik dhe se pistat e ngritura nga policia janë vrasje për shkak të detyrës, konflikt i çastit apo edhe një tentativë grabitje, ku si polic Prela mund të ketë reaguar dhe është vrarë.
Prela njihej si një person mjaft pozitiv, me rezultate shumë të mira në Akademinë e Sigurisë ku studionte, ndërsa nuk ka patur sherre në të kaluarën. Policia deri tani nuk ka asnjë provë që e implikon të ndjerin me personazhe problematik. /Shqiptarja.com/
