Vllaznia nis merkaton verore, prag rinovimi me gardianin e portës, afër firmosjes ish- sulmuesi shkodran…

Edhe pse ende pa një trajner, te Vllaznia nuk duan të humbin kohë sa u përket lëvizjeve në hyrje dhe dalje të merkatos verore. Ildi Gruda pritet të jetë goditja e parë e Vllaznisë në merkaton e verës. Nga burime në klubin shkodran, mësohet se sulmuesi që mbylli sezonin te Teuta, ka pasur bisedime intensive së fundmi me drejtuesit kuqeblu dhe në parim ka gjetur akordin.

Ndërkohë, duke qenë se shumë lojtarë janë në skadencë kontrate, së fundmi drejtuesit e klubit shkodran kanë nisur bisedimet me ata që kërkojnë të mbajnë në skuadër për të paktën edhe një sezon. Mësohet se portieri malazez, Bojan Zogoviç, ka marrë tashmë një ofertë zyrtare për të zgjatur kontratën.

Burime në klub tregojnë se drejtori sportiv, Elvis Plori, ka takuar portierin dhe i ka bërë ofertën për kontratën e re, e cila pritet të jetë me terma të përmirësuar financiarë. Palët janë drejt mbylljes së marrëveshjes edhe për një sezon tjetër dhe kjo tregon për besimin që portieri dhe klubi kanë ndaj njëri-tjetrit.

Ky është sezoni i katërt që Zogoviç është pjesë e Vllaznisë, gjithnjë nëse firmos zyrtarisht kontratën edhe për vazhdimësinë. Ai ka pranuar në parim kushtet e ofruara dhe gjasat janë që pas nisjes së stërvitjes më 12 qershor, portieri të paraqitet në Shkodër dhe të firmosë edhe zyrtarisht kontratën e re.

Në klubin kuqeblu janë të bindur se pavarësisht sezonit jo të mirë të skuadrës, reparti i portës nuk duhet të ndryshohet, pasi krahas Zogoviçit, i gatshëm për një fanellë titullari është edhe i riu shkodran, Kristi Qarri, i cili sa herë është aktivizuar ka bërë mirë në takimet e Kupës së Shqipërisë.