Pas fitores së djeshme me Apoloninë, ekipi i Vllaznisë sot nuk ka zbritur në fushen e stervitjes sepse futbollistët kanë lënë të lirë për të zhvilluar një stervitje relaksuese në pishinë dhe në sallën e forcës.
Nga nesër ndërkohë skuadra do të fokusohet maksimalisht tek sfida e së dielës me Skenderbeun, sfidë kjo që do të luhet në stadiumin “Loro Boriçi” të Shkodrës.
Por në prag të kësaj ndeshje, për stafin teknik ka lajme të mira sepse të paktën dy prej lojtarëve që munguan në Fier, do të kthehen për të luajtur.
Bëhet fjalë për mbrojtësin Eni Imami dhe mesfushorin Ardit Krymi. Ata të dy ishin të skualifikuar me kartona dhe tashmë i kanë shlyer, çka do të thotë se do të mundet të luajnë këtë javë.
Në pritje për t’u rikuperuar është edhe braziliani Victor da Silva dhe kjo do të ishte diçka e mirë për stafin teknik sepse do të kishte më shumë alternativa në dispozicion.
Megjithatë trajneri Brdariç është nga ata që nuk ankohet për këtë gjë dhe ka besim tek të gjithë lojtarët që stërvit, megjithatë t’i kesh në dispozicion të gjithë lojtarët, nuk është keq.
