Vllaznia fiton miqësoren me Tërbunin, vëmendja tek derbi i Superligës me Tiranën të shtunën…

Pas 4 ditëve në Ulqin, Vllaznia u rikthye në Shkodër. Në mungesë të miqësores me Prishtinën, në minutat e fundit u sigurua një tjetër me modestët e Terbunit. Gjithsesi, një ndeshje që sherben disi në prag të rifillimit të Superligës.

Vllaznia e ka nisur ndeshjen me kete formacion: Zogoviç, Gurishta, Adili, Diagne, Hakaj, Krymi, Heriç, Da Silva, Kruja, Latifi dhe Çoba. Me shumë mundësi, do të jetë edhe formacioni që do të rinisë aventurën në kampionat.


Me rezultatin 1-0 në favor të Vllaznisë është mbyllur pjesa e parë ndaj Terbunit e cila u luajt stadiumin “Loro Boriçi”. Autor i të vetmit gol në këtë pjesë ka qenë sulmuesi Çoba 8 minuta para fundit te saj.

Në pjesën e dytë janë kryer zëvendësime të shumta, ndërsa kanë ardhur edhe tre gola të tjerë për Vllazninë. Mustedanagiç, Hoxhaj dhe Maliqi të futur si zëvendësues, kanë përshendetur 3 herë rrjetën duke fiksuar rezultatin 4- 1 në favor të kuqebluve.

Me 15 janar Vllaznia do të luajë derbin e Superligës me Tiranën në kryeqytet. Përveç se përballë kryesuesve të kampionatit, kuqeblutë duhet të mposhtin edhe një “mallkim” pasi statistikat janë në favor të vendasve bardheblu.

Një mbështetje më shumë duket se do të jenë tifozët, të cilët kanë nisur tashmë përgatitjet për të shoqëruar ekipin e zemrës në sfidën e vështirë dhe shumë të rëndësishme me Tiranën.