“Vllaznia duket se ka filluar një revolucion…”, ish- mbrojtësi kuqeblu Elvin Beqiri: Lika dhe Shtubina duheshin mbajtur…

Vllaznia ka ndryshuar rrënjësisht këtë sezon. Ka pasur hyrje-dalje masive në radhët e lojtarëve, por edhe në staf. Ky transformim nuk shihet me sy fort të mirë prej Elvin Beqirit. Ish-kapiteni i kuqebluve përshëndet zgjedhjet e bëra për stolin, por në anën tjetër u tërheq “veshin” drejtuesve për largimet dhe sidomos të pjesës më me eksperiencë.


Në një intervistë dhënë për “Panorama Sport”, trajneri i Shqipërisë U-17 thekson se është gabuar me Gilman Likën e Ndriçim Shtubinën. Ai ka “skanuar” edhe lëvizjet e tjera të bëra në merkato, ndërsa hapur e thotë që bojkoti nuk po ndikon mirë te shkodranët.

Elvin, si e shikoni këtë Vllazni?

Vllaznia duket se ka filluar një revolucion, me ndryshime të mëdha në lojtarë apo edhe në staf. Mendoj se ardhja e trajnerit Tomas Brdariç dhe ndihmësit të tij Plori janë vlerë e shtuar për skuadrën.

Çfarë ndikimi mund të japin kaq shumë ndryshime në skuadër, pasi janë afruar 16 lojtarë dhe larguar 13?

Mbështet ShkodraWeb Media

Nuk më duket me vend ndryshimi i kaq shumë lojtarëve. Kanë ikur 13 dhe janë afruar 16 të tjerë. Janë realisht shumë dhe kjo gjë mendoj se mund të prishë balancat e ekipit.

Mes largimeve janë edhe disa titullarë të padiskutueshëm nga sezoni i kaluar, si e gjykoni këtë zgjedhje të drejtuesve?

Lojtarë si Gilman Lika apo Ndriçim Shtubina duhet të ishin pjesë e ekipit për 1001 arsye. Qoftë për eksperiencën apo edhe atë çfarë kanë dhuruar në vite te Vllaznia, nuk duhet të largoheshin.

Pa nisur ende sezoni, shpallën “divorcin” edhe me një nga afrimet e verës dhe këtu i referohemi mbrojtësit brazilian Vinicius Kasius…

Me aq sa kuptoj, drejtuesit e rinj kanë nënshkruar parakontrata me të gjithë. Dhe largimi i mbrojtësit Kasius ka ardhur në bazë të një klauzole që e kanë nënshkruar të dyja palët. Qëndrimi varet nga performanca e secilit dhe derisa është larguar, do të thotë që nuk e ka bindur stafin teknik.

U bë më shumë se një muaj që shtyhet nisja e kampionatit, si mund të ndikojë bojkoti te Vllaznia?

Them se nuk është në favor të Vllaznisë. Kjo, pasi ekipi u formua herët këtë sezon, ku edhe zhvilloi një fazë të rregullt përgatitore. Kuqeblutë më duken “të dëmtuar” në këtë aspekt, pasi ishin bërë përgatitjet e duhura dhe serioze për fillimin e kampionatit. Uroj që çdo gjë të zgjidhet shpejt dhe ekipet të kthehen në fushën e lojës.

Si i shikoni objektivat e vënë nga klubi dhe sa larg mund të shkojë kjo Vllazni për sezonin 2020-2021?

Dëshira e të gjithëve është që të realizohen, por mendoj se është shumë herët të flitet për objektiva. Gjithçka duhet që të jetë hap pas hapi.

ShkodraWeb Media 2017 – 2020 © TË GJITHA MATERIALET NË KËTË FAQE MUND TË PËRDOREN LIRISHT NGA INDIVIDË E MEDIA, DUKE CITUAR NGA JANË MARRË. FALEMINDERIT!

ShkodraWeb Channel
ShkodraWeb Marketing