“Vlerë për qytetin tonë dhe për Shqipërinë”, kandidati Bardh Spahia i “Shtëpia e Lirisë” publikon foto me legjendën e sportit

Në takimet që po zhvillon në Shkodër, Bardh Spahia i “Shtëpia e Lirisë” vazhdon të bashkëbisedojë me shkodranët. Ai është takuar dhe me një emër shumë të madh të sportit shqiptar, Sabah Bizin, “Nderi i Kombit”.

“Zotni Sabah Bizi është vlerë për qytetin tonë dhe për Shqipërinë, jo vetëm në fushën e blertë por edhe si model qytetarie. Të paçim sa më gjatë mes nesh!”, shkruan kandidati për Bashkinë e Shkodrës Bardh Spahia.


Sabah Bizi konsiderohet si një nga emrat më të mëdhenj të futbollit shqiptar, i vlerësuar me nota maksimale edhe nga yje të kalibrit të Bekenbauer.

Përveç se si futbollist, Sabah Bizi ka spikatur edhe si trajner, duke ndihmuar dhjetra e dhjetra talente, një pjesë e të cilëve kanë shkëlqyer brenda e jashtë vendit.

Në Shkodër por edhe përtej saj, Bizi vlerësohet edhe si simbol i qytetarisë por edhe i mirësisë.