
Një bandë shqiptaro-italiane është shkatërruar në Katania, ndërsa 7 persona janë arrestuar. Të arrestuarit janë 4 italianë dhe 3 shqiptarë, Maridian Sulaj, Moisi Habilaj dhe Fatmir Minaj, ndërsa 4 shqiptarë të tjerë janë në kërkim.
Katër shqiptarët e tjerë që janë në kërkim, sipas medieve italiane janë fshehur në Shqipëri, ndërsa janë sinjalizuar autoritetet për prangosjen dhe ekstradimin në Itali për t’u gjykuar.
Gjatë operacionit të quajtur ‘Rosa dei venti’, janë sekuestruar edhe 20,000 euro kesh. Nga hetimet është zbuluar se gjatë viteve të fundit banda ka mundur të transportojë mbi 3.500 kg marijuanë nga bregdeti shqiptar për në Itali, dërgesa e transportime që me raste kanë përfunduar edhe me arrestimin e më shumë se 20 ‘’korrierëve’’, së bashku me konfiskimin e armëve kallashnikov e qindra municioneve.
Droga ishte e destinuar për vende të tilla si Catania, Ragusa dhe Siracusa. Nga trafikimi i armeve dhe lëndëve narkotike qarkullonte një total i vlerësuar në shumën mbi 20 mln euro.
Shqiptarët e arrestuar: Moisi Habilaj, Maridian Sulaj dhe Fatmir Minaj
Italianët: Antonio Riela, Vincenzo Spampinato, Gianluca Passavanti dhe Angelo Busacca. /shqiptarja.com/