Pa më të voglin dyshim, është një nga aktoret më të mira të skenës dhe ekranit shqiptar dhe sigurisht, ylli polar i humorit shkodran e shqiptar: Zyliha Miloti, Mjeshtre e Madhe.
Mbi 65 vite karrierë, në skenë e në ekran, përherë e freskët, përherë e kthjellët, Zyliha Miloti mund të konsiderohet sot legjendë e humorit, ndoshta për të gjithë historinë e tij.
E kush më shumë se ajo meriton vëmendje, e kush më parë se ajo duhet të përjetësohet në një dokumentar, i cili gjithsesi, mbetet shumë pak për atë që përfaqëson dhe do të përfaqësojë edhe në dekadat që do të vijnë.
“’Zyliha Miloti – aktorja e 1000 roleve’, një dokumentar kushtuar artistes së madhe të Shkodrës do të shfaqet premierë për publikun shkodran në Kinema Republika.
📅E premte, 27 qershor 🕢 Ora 19:30
Një mbrëmje emocionuese në nderim të një jete të tërë në shërbim të artit dhe kulturës, me skenar të Klodiana Shpendit, regji të Arian Çuliqit dhe realizim nga RTSH.”, shkruan në rrjetet sociale kryebashkiaku i Shkodrës, Benet Beci, duke njoftuar eventin e rëndësishëm.
