Një zjarr i përmasave të mëdha ka rënë në nënstacionin elektrik të Draçinit në Shkodër. Nuk dihen zyrtarisht shkaqet e flakëve, të cilat duket se janë shfaqur fillimisht në një transformator.
Ndërkohë, në vendngjarje është policia dhe zjarrëfikëset që po përpiqen të shuajnë zjarrin. Si pasojë e zjarrit, në disa zona është ndërprerë furnizimi me energji elektrike, ndërsa shtëllungat e tymit tregojnë përmasat e ngjarjes.
Shkodër/Informacion paraprak
Rreth orës 11:30, dyshohet se për shkak të shkëndijës elektrike ka rënë zjarr në kabinën elektrike të një pallati në rrugën “Vëllezërit Frashëri”. Shkëndija në kabinë ka shkaktuar masë elektrike në nënstacionin elektrik në vendin e quajtur “Draçin”. Si pasojë, në nënstacion është ndezur zjarr dhe përhapja e flakëve ka shkaktuar zjarr dhe në magazinën në pronësi të shtetases R. L., 34 vjeçe, objekt që ndodhet në afërsi të nënstacionit. Nga zjarret ka vetëm dëme materiale.
Shërbimet e Policisë po bashkëpunojnë me zjarrfikësit, për të mundësuar shuarjen e zjarreve.
Ndërkaq, grupi hetimor, nën drejtimin e prokurorit, po heton për të dokumentuar shkaqet e këtyre rasteve.
