Vllaznia ka nisur vitin duke mposhtur Tiranën me rezultatin 2-1. Një sfidë që u fitua me përmbysje në pjesën e dytë nga kuqeblutë. Pas ndeshjes së vlefshme për javën e 20-të, foli trajneri Brdariç.
“Duhet të uroj ekipin për fitore fillimisht. Ishte nga ndeshjet më të bukura të sezonit. Ndërruam diçka në pjesën e dytë dhe treguam fytyrë tjetër. Kjo fitore e derbit të shijon.
Zëvendësimi i Stojanoviç? Ishte frika ime, që diçka mund të ndodhë. Për mua ishte për ta ruajtur, nuk besoj diçka serioze. Ai u zëvendësua në kohën e duhur.
E nisëm shumë keq. Humbëm topa dhe duele, nuk ka lidhje me cilin ekip do luash. Nuk mund të fitosh ndeshje. Patëm pak fat. Në pjesën e dytë mund të pësonim golin e dytë apo tretë. Çfarë treguam në pjesën e parë nuk mund të ndodhë më. E dimë që mund të bëjmë më mirë. Nëse Tirana na lejon, ne shkuam dhe e kemi kualitetin. E përdorëm. Jam i lumtur për Bekimin se nuk kishte shënuar, por besuam tek ai. Po ashtu dhe për portierin, Jukaj bëri pritje të rëndësishme dhe na shpëtoi.
Po mendoja a t’i bëj zëvendësimet që në pjesën e parë, pasi kishim shumë probleme. Nuk dinim si ta parandalonim problemin se dukej i madh, por morëm masat në fundin e pjesës së parë. Dolëm më mirë në sulm dhe duhet të jesh sa më efektiv në futboll, kjo është e gjitha”, u shpreh Brdariç për RTSH.
Në përfundim të sfidës nuk munguan batutat e Bekim Balaj, ku ai tha se u motivua nga pak prej sfidës me Tiranën, Zabërgjës që e kishte parakaluar në renditjen e golashënuesve dhe Mensah si afrimi i fundit.
“Për mua e rëndësishme të kontribuoj për skuadrën. Sot arrita të shënoj dhe fituam një ndeshje të rëndësishme, na mban në vendin e parë. Është vetëm ndeshja e parë, kemi shumë për të bërë.
Për mua golat janë gjithmonë të rëndësishëm, pak rëndësi ka kujt i shënoj. Me Tiranën ka rëndësi sepse jo më kot është derbi i Shqipërisë. Shpresoj që mbështetja e tifozëve të mos mungojë dhe t’i kemi më të shumtë në ndeshjet e ardhshme.
Mundohem të jap më të mirën time. Gjithsesi motivimi dhe dëshira për të dhënë më të mirën nuk më ka munguar. E ndjej peshën e fanellës sepse këtu jam rritur dhe luaj në qytetin tim, për Vllazninë që më ka dhënë shumë. Jam kthyer me dëshirën për të bërë më të mirën.
Sot nuk e nisëm në mënyrën më të mirë. Goli i Tiranës na vendosi pak në siklet, por reflektuam në pjesën e dytë. Goli i dytë ishte ai që na gëzoi të gjithëve, akoma më shumë mua sepse ishte i fitores.
E rëndësishme për ne kur sheh “Loro Boriçi” të flaktë dhe në mbështetje të Vllaznisë. Disa ndeshje realisht na ka munguar dhe shpresoj ta kemi në ndeshje të ardhshme sepse është energji ekstra për çdo lojtar.
Shpresoj të jem në gjendje të kontribuoj në më shumë klasike dhe te Vllaznia. Ka lojtarë që kanë talentin, por nuk mjafton. Duhet shumë punë çdo ditë në terren. Kanë mundësi të artë të veshin fanellën e Vllaznisë. Duhet vetëm të punojnë. Asgjë nuk vjen rastësisht, mundohem të jap një shembull”, tha Balaj.
Ju zgjoi Tirana, Zabërgja apo Mensah që ka ardhur? “Të gjitha nga pak(qesh), e rëndësishme që u zgjuam në ditën e duhur dhe fituam një ndeshje shumë të rëndësishme”, tha më pas sulmuesi i Vllaznisë për RTSH.
