Vllaznia ka marrë një fitore të rëndësishme me Bylis në “Loro Boriçi”. Kuqeblutë e Mirel Josës nuk kanë bërë një ndeshje të mirë por në fund i gëzohen tre pikëve për Superligën.
Një pjesë e parë që nuk u ngrit asnjëherë në lartësinë e duhur as nga Vllaznia dhe as nga miqtë, megjithatë është mbyllur me avantazhin e Vllaznisë. Në minutën e 39- të Herald Marku, tashmë i zakonshëm me golat e tij, godet në kufinjtë e zonës së Bylis me të djathtën dhe portieri Teqja sheh topin të pushojë në rrjetë.
Goli i dytë i Vllaznisë, duket se do të vuloste fitoren e një ekipi më shumë cinik se dominues. I sapo futur në lojë, Jonuzi lëshon një silur me të djathtën e tij. Teqja nuk është në ditën më të mirë dhe topi i kalon poshtë krahut duke u ndalur në rrjetë.
Është minuta e 72- të dhe Vllaznia mendoi se e hipotekoi fitoren. Në fakt, Bylis rrezikon me sulmet e tij. Në minutën e 83- të gjen golin me Damcevskin, i cili godet me kokë në zonën e Vllaznisë dhe topi pushon në rrjetën kuqeblu.
Në fund drithërima për Vllazninë. Qardaku i Bylis rrëzohet në zonë, duke pretenduar një pengim nga portieri Zogoviç. Gjyqtarët e VAR bëjnë verifikimet e duhura dhe nuk ka penallti për Bylis. Vllaznia merr tre pikë dhe pret në Shkodër Erzenin, i cili në hapje të Superligës e mundi.
