Vllaznia e pafat në gjysmëfinalen e parë të Kupës së Shqipërisë. Kuqeblutë janë arritur në minutën e fundit të një shtese të pafund, në ndeshjen e parë të gjysmëfinales.
Ka qenë një ndeshje ku Vllaznia ka kontrolluar përgjithësisht lojën, duke krijuar volum por edhe patur raste shënimi. Goli ka ardhur në minutën e 42- të pas disa kombinimeve mes Dodaj, Kallaku dhe Bismark, i cili shënon në portën dinamovite.
Edhe në pjesën e dytë ka qenë një ndeshje e kontrolluar nga Vllaznia, ndërsa heroi ka qenë portieri Jukaj. Në minutën e 53- të ai ka pritur një penallti të Bregut, ndërsa ka qenë vendimtar me ndërhyrjet e tij edhe në disa goditje të Dinamos.
Në minutën e dytë shtesë nga 4 të akorduara, ka edhe një karton të kuq për Gurishtën për ndërhyrje të rëndë me taka ndaj kundërshtarit Neziri. Golin e barazimit Dinamo e shënoi me 11- metërsh, të akorduar nga VAR. Bregu këtë herë e ktheu në gol, duke mposhtur Jukën.
Ndeshjen e kthimit, Vllaznia do ta ketë disi më të lehtë pasi luan në fushën e vet por asgjë nuk është siguruar për finalen e Kupës së Shqipërisë, e cila është tjetër objektiv i kuqebluve.
