Vllaznia luan këtë të diel atë që mund të konsiderohet si ndeshja e sezonit. Kuqeblutë do të përballen me Dinamon në gjysmëfinalen e pare të Final 4, me synimin kalimin në finale, ku do të gjejë fituesen e gjysmëfinales tjetër Egnatia- Partizani.
“Nesër do të jetë një sfidë e madhe. Duhet të punojmë shumë që të bëjmë hapin e radhës pasi kanë mbetur edhe dy të tillë. Nesër duhet të japim më të mirën tonë për të qenë në finalen për titullin kampion. Kemi punuar fort përgjatë këtyre ditëve. Objektivi ynë është të vazhdojmë këtë rrugëtim. E dimë mirë rëndësinë e ndeshjes dhe duhet të bëjmë çdo gjë për të arritur fitoren. Duhet të zbatojmë gjithçka që kemi aplikuar gjatë këtyre ditëve në stërvitje. Pavarësisht se kemi avantazhin e barazimit, ne duhet të hyjmë në fushën e lojës për fitore. Padyshim duhet të tregohemi të kujdesshëm në ruajtjen e një balance të mirë në mes reparteve të skuadrës.”, tha Brdaric.
Në këtë ndeshje, Vllaznia shkon e favorizuar si e renditur e dyta në Superligë. Për të kaluar më tej, i mjafton përveç fitores, edhe barazimi përballë Dinamos. Përtej kësaj, lajmi i mire është se Brdariç nuk do të ketë dhimbje koke për formacionin.
“Jemi të bindur që i kemi të gjithë lojtarët e gatshëm për këtë takim. Gjithsecili prej tyre ka punuar fort deri në këtë moment ndaj duhet të marrim maksimumin prej tyre. Tani ndihemi gati për lojë. E dimë mirë se çfarë ekipi do të kemi përballë.”, tha Brdaric.
Vllaznia në ndeshjen me Dinamon, ka edhe një tjetër avantazh. Dinamo luajti dy ditë më parë finale e kupës me Egnatian dhe fizikisht, nuk është në nivelin e kuqebluve. Ndërkohë, në aspektin psikologjik, ajo vjen si fituese e Kupës së Shqipërisë pas 22 viteve mungesë.
