Atëherë kur nuk duhej e kur nuk pritej, Vllaznia merr një humbje që mund ti kompromentojë të gjithë sezonin. Kuqeblutë janë mundur në Elbasan nga ekipi me të njëjtin emër dhe kanë lënë vendin e parë në krye të Superiores pikërisht vendasve.
Në javët e mbetura të kampionatit, nuk kanë shumë rëndësi rastet apo edhe loja në fragmente të 90 minutave por pikët. Fatkeqësisht, pas eliminimit nga Dinamo në Kupë, Vllaznia kompromenton disi edhe Supërligën.
Goli i parë për vendasit mban firmën e Tsague. Lajthia nga e majta harkon në qendër kur Diallo devijon sferën që shkon te Tsague. Sulmuesi, i vetëm në qendër të zonës dhe i mbajtur në lojë nga Gjini, shënon në portën e Pohls.
Goli i dytë mban firmën e një prodhimi të shkollës shkodrane të futbollit. Lila driblon këdo që i del para nga e djathta, harkon në qendër ku Lajthia me kokë shënon golin e dytë.
Pjesa e dytë është më e mirë për Vllazninë, kërkon më shumë golin, godet dhe shtyllë shënon edhe gol por kaq. Festojnë disa kuqeblutë pas një aksioni ku Kallaku gjen Qaton në zonë dhe mesfushori mposht Totoshin me një gjuajtje të fortë.
Nuk zgjat shumë entuziazmi i shkodranëve, vetëm 4 minuta, pasi Lajthia merr topin para zonës së kuqebluve, driblon këdo që i del përpara dhe me një gjuajtje të shkëlqyer mposht Pohls.
Kuqeblutë regjistrojnë një humbje mjaft të hidhur, ndërsa kanë mbetur edhe tre ndeshje me Tiranën, Bylis dhe Flamurtarin. Duke qenë tashmë në vendin e dytë, dy pikë larg Elbasanit kryesues.
