Policia e Shkodrës dhe veçanërisht Forcat “Shqiponja” kanë shtuar kontrollet për rritjen e parametrave të sigurisë. Sidomos në orët e mbrëmjes dhe në zona me qarkullim të dendur qytetarësh, është bërë e mundur të vihen në pranga disa persona. Kështu, në orët e fundit është prangosur në Shkodër një qytetar, i cili është gjetur në zotërim të një pistolete. Edhe në Malësinë e Madhe kanë vijuar kontrollet, ku është kapur pasi ka patur sinjalizime nga qytetarët 26- vjeçari dyshohet se ka shtënë në ajër. Më poshtë, njoftimi i plotë i Policisë së Shkodrës.
Kontrolle nga policia per rritjen e parametrave të sigurisë.
Kontrollet për kapjen e personave që qarkullojnë me armë zjarri.
Arrestohet në flagrancë një 30 vjeçar që qarkullonte me armë në qytet, nderkohë që në Malësinë e Madhe arrestohet dhe një 26 vjeçar i cili dyshohet se ka qëlluar në ajër me armë zjarri një ditë më parë.
Nga strukturat e Drejtorisë Vendore të Policisë Shkodër, pas një pune të mirëorganizuar u bë arrestimi në flagrancë i shtetasit D. H. 30 vjeç, banues në lagjen Guerrile, Shkodër, pasi në lagjen “Salo Halili”, gjatë kontrollit të ushtruar në mjetin tip Audi, iu gjet dhe bllokua në cilësinë e provës materiale arma e zjarrit Pistoletë tip Beretta, me një krëhër me 15 fishekë.
Arrestimi për veprën penale “Mbajtja pa leje dhe prodhimi i armëve, armëve shpërthyese dhe i municionit”.
Gjithashtu nga strukturat e Komisariatit të Policisë Malësi e Madhe u bë arrestimi në flagrancë i shtetasit A. M. 26 vjeç, banues në fshatin Bogë, Malësi e Madhe, pasi në bazë të informacioneve të ardhura nga qytetarët dyshohet se në vendin e quajtur Okol, Malësi e Madhe, ka qëlluar me armë zjarri në ajër, ku grupi hetimor në vendngjarje sekuestroi prova ligjore për dokumentimin e ngjarjes.
26 vjeçari u arrestua për veprat penale “Prodhim dhe mbajtje pa leje të armëve tē zjarrit dhe municioneve” si dhe “Prishje e rendit e qetësisë publike”.
Materialet hetimore ju referuan Prokurorisë pranë Gjykatës së Shkallës së Parë Shkodër per veprime të mëtejshme.