Kryeministri Edi Rama gjatë një takimi me të rinjtë në Shkodër, ku u prezantuan edhe kandidatët për deputetë tha se në 11 maj duhet të marrë votën e shqiptarëve për të anëtarësuar vendin në BE.
Sipas kryeministrit Rama për Shqipërinë është hapur një dritare për të hyrë në Bashkimin Evropian, por që nuk do të qëndrojë gjatë e hapur. Në 11 maj tha kryeministri- nuk mund të rrezikojmë që Shqipëria te mbetet jashtë BE për një kohë të pacaktuar.
“Të gjitha partitë thonë që duam Shqipërinë në BE, kjo është pozitive. Shqiptarët qoftë majtas qoftë djathtas duan që Shqipëria të jetë në BE. Por ajo që duhet shpjeguar është fakti që pavarësisht se ca ndodh këtu ne për dy vjet do hyjmë në BE. Ne do hyjmë në BE vetëm nëse jemi të suksesshëm me mbylljen e negociatave.
Është e rëndësishme që në 11 maj, ndërkohë që në 12 ne numërojmë votat ata që merren me negociatat të vazhdojnë punën të patrazuar dhe ajo që del nga kutitë e votimit të jetë një mesazh kompakt dhe një mesazh kumbues për Brukselin që duam Shqipërinë një orë e më parë në BE.
Ne duhet të jemi të qartë për të gjitha pse-të e rëndësisë së 11 majit. Ne mund të mbetemi jashtë për një kohë të pacaktuar dhe kjo do të ishte një goditje që do ti jepnim vetes.
Unë besoj që është e rëndësishme që njerëzit ta dinë, se ca humbim nëse në 11 maj lozim me porta të vogla, nëse më 11 maj merremi me gjera që kanë rëndësinë e tyre, por nuk janë aq të rëndësishme sa anëtarësimi në BE”, tha Rama.
Kryeministri Edi Rama teksa foli për listën e kandidatëve të Partisë Demokratike, bëri përjashtim një grua deputete aktuale e parlamentit. Edhe pse nuk i përmendi emrin, ai tha se ka respekt. Ndërsa të tjerët -tha ai- janë bir Selmani i nënës kë të qaj më parë.
“Dua të bëj një përjashtim, ka vetëm një zonjë aty që nuk bën pjesë, që unë kam respekt se është gjë tjetër në atë listë që është deputete aktuale. Të tjerët aty janë nuk e di…andej nga jugu thonë: Bir Selmani i nënës kë të qaj më parë. Nëse ka një vend që demokratët për të gjitha arsyet që thashë, kanë edhe një arsye plus që tju bëjnë atë që nuk thuhet në kokë, atyre që janë paraqitur si ofertë alternative e kësaj skuadre tonë është Shkodra. Janë bëmat e tyre në Shkodër”, tha Rama.
Kreu i qeverise u shpreh se ‘pa pikë turpi kerkojnë vota për Shkodren Madheshtore”.
“Pa pikë trupi këta duan vota për Shkodrën Madhështore. Por cila është Shkodra madhështore e tyre, sepse s’kemi as Jozefinën këtu se e kanë marrë e kanë mbyllur në burgun e listës së mbyllur të Tiranës”,deklaroi Rama.
Rama ironizoi programin e PD për zgjedhjet, duke e cilësuar si një program me ‘qofte e pica’.
“Edhe për atë programin me qofte e pica, gjithë llojet e tavave të dheut, që në 12 Maj do të shtrohen në të gjitha rrugët e Shqipërisë, do të mbushet Shkodra, i thashë Benetit se duhet me pastruar trotuaret se bo vaki fiton këneta, dhe do mbushen trotuaret me tava dheu, krap, ngjala, vezë e qofte.”, tha Rama.
