Gazetari Enrik Mehmeti ka reaguar ashpër pas procedimit penal të bërë publik ditën e sotme, duke e cilësuar si një përpjekje për presion dhe heshtje të medias. Në një deklaratë publike, Mehmeti thotë se është përballur me kërkesa direkte për të mos publikuar pamjet ku shihet një drejtues policie duke dhunuar një të ri sapo kishte mbushur 18 vjeç.
“Një kërkesë e tillë është e papranueshme për mua si gazetar. Asnjëherë nuk kam dhe nuk do të pranoj presione të tilla, pavarësisht se nga kush vijnë,” shprehet Mehmeti, duke theksuar se prania e tij në vendngjarje kishte vetëm një qëllim: dokumentimin e së vërtetës.
Gazetari deklaron se në momentin e ngjarjes policia vonoi ndërhyrjen dhe se për orë të tëra nuk kishte asnjë efektiv në vend, përveç zëvendësdrejtorit të Policisë së Vlorës, Klodian Kondi, të cilit ai i drejton pyetjen publike: “A më kërkuat të mos publikoj pamjet ku kolegu juaj dhunon kamarierin?”
Mehmeti akuzon se emri i tij është përfshirë në komunikatën zyrtare pa asnjë provë, dëshmitar apo pamje sigurie, duke paralajmëruar se do të publikojë dëshmitë dhe faktet që policia nuk ka administruar. Ai e cilëson këtë si një sulm të drejtpërdrejtë ndaj lirisë së medias dhe përpjekje për të mbuluar dhunën e ushtruar nga efektivë të policisë.
“Unë nuk do ta mbyll kurrë gojën për të publikuar vetëm të vërtetën, pavarësisht presioneve të çdo lloj forme, qofshin edhe me procedim penal,” shkruan gazetari, duke theksuar se ka marrë qindra mesazhe mbështetjeje nga qytetarët.
Në fund, Mehmeti kërkon nga drejtësia hetim të plotë dhe një kërkesë publike faljeje nëse akuzat ndaj tij rezultojnë të pabazuara.
