Senada Mehmeti, kandidate për deputete e PD- ASHM për qarkun Shkodër, vetëm pak orë para “heshtjes zgjedhore”, ka marrë mbështetjen e Rudi Vatës, ish- kapitenit të Kombëtares Kuqezi dhe një nga emrat më të shquar në futbollin shqiptar.
Mehmeti, ka shpërndarë një video nga një takim i shkurtër me Vatën, i cili i ka premtuar se ai, bashkë me nënën e tij, do të votojnë me 11 maj 2025 kandidaturën e saj.
“Takim frymëzues me legjendën e futbollit shqiptar dhe ish-kapitenin e Kombëtares, z. Rudi Vata — një figurë që mishëron atdhedashurinë, përkushtimin dhe vizionin e një lideri të vërtetë! Fjalët e tij të ngrohta dhe mbështetja e sinqertë që më shprehu si kandidate e Partisë Demokratike, më japin forcë dhe motivim për të vijuar më vendosmëri në këtë rrugëtim politik.
Zëri i rinisë po ngrihet dhe besimi i figurave të respektuara si Rudi Vata është një dëshmi e qartë se ndryshimi është i mundur dhe se e ardhmja është në duart e brezit të ri! Me mbështetje, me vizion dhe me dashuri për vendin tonë, do të ndërtojmë Shqipërinë që duam!”, shkruan Senada Mehmeti në komentin që shoqëron videon e takimit me Rudi Vatën.
