Bashkia Shkodër në bashkëpunim me Shoqërinë rajonale të ujësjellës kanalizime Shkodër prej 1 muaj ka nisur punën për ndërtimin e ujësjellësit të fshatrave Bardhaj dhe Bleran. Firma e kontraktuar për kryerjen e punimeve tregon se afati është 18 muaj por projekti do të përfundojë më herët pasi po punohët me ritme të shpejta falë edhe asistencës që ujësjellësi ka dhënë me mjete dhe forcë punëtore.
Nga ky projekt do të përfitojnë rreth 800 familje me mbi 4 mijë banorë të cilët prej vitesh kanë vuajtur mungesën e ujit të pijshëm tha administratori i njësisë Rrethina Gerald Hasaj.
Për banorët e zonës ky investim është i shumëpritur dhe do të lehtësojë jetesën e tyre. Ata shprehën të gatshëm për të shlyer çdo detyrim pas lidhjes së matësve.
Së pari po ndërtohët stacioni i pompimit i cili do të ketë 3 puse dhe përmes tyre do dërgojë ujin në 2 depot të cilat më pas e shpërndajnë në fshatrat Bardhaj dhe Bleran. Në total janë parashikuar rreth 800 lidhje familjare ku uji do të ofrohet në parametra cilësor dhe do të jetë i bollshëm 24 orë duke i dhënë kështu fund kalvarit të mungesës së ujit të pijshëm për zonën e Bardhajve dhe Bleranit.
