Pas debatit absurd të mbrëmjes së djeshme mes tij dhe kreut të urbanistikës së bashkisë së Lezhës, Ministrit i Brendshëm Sandër Lleshaj i është rikthyer sërish çështjes së godinës 12 katëshe në qytet, e cila kishte pësuar dëmtime prej tërmetit.
Lleshaj tha se tashmë banorët mund të hyjnë të qetë në banesat e tyre, pasi brenda 24 orëve janë kryer për godinën dy ekspertime, një nga inxhinierë shqiptarë dhe një nga inxhinierë izraelitë.
Por sërish Lleshaj nuk i është shmangur debatit me qytetarët dhe me një ish deputete të PD-së, e cila i ka kërkuar Ministrit një dokument certifikimi mbi gjendjen e pallatit ku jetojnë 140 familje. Lleshaj ka nisur të ironizojë ish- deputeten duke i thënë se as për 100 vjet nuk ja jep dokumentin e vulosur dhe se ditën e djeshme u krijua një panik i kotë.
“E gjithë zhurma e ngritur është një “shumë zhurmë, për asgjë”, e me këtë rast dua t’i ftoj të gjithë banorët e pallatit që të kthehen në shtëpitë e tyre, t’i kthehen jetës normale dhe të na lënë mundësi të merremi me problemet e shumta që ka në vendet e tjera. Nuk ka asnjë problem me sigurinë e këtij pallati të certifikuar dy herë brenda 24 orëve, dhe banorët duhet të kthehen në shtëpitë e tyre. Dhe ju lutem të gjithë atyre që po e përdorin këtë kohë për të bërë zhurmë, të mos bëjnë zhurmë kot.”-tha Lleshaj.
Megjithatë pas fjalës së tij atij i është kërkuar dokumenti me dy vula i inspektimit për pallatin në fjalë. Kjo ka sjellë një debat tjetër mes tij dhe ish-deputetes Lindita Metaliaj të cilës ai gjatë debatit i drejtohet duke i thënë “shko edhe gjej punën”.
DEBATI ME ISH-DEPUTETEN
Nje banor i pallatit: Duam të shohim dokumentin me firmë
Lleshaj: Jo nuk kam
Lindita Metaliaj: Zoti ministër, në këtë pallat banojnë 140 familje. E duam një shkresë, me firmë dhe vulë. Ekspertët nuk i kishin të gjitha pajisjet. Si mundet vetëm me fjalë. Kush janë ekspertët zoti ministër?
Lleshaj: Po lërë mo ti…Do t’i biem tek ti? Do t’i certifikosh ti? Me vulë nuk e merrni as sot e 100 vjet
Lindita Metaliaj: Ju nuk i certifikoni dot, ju nuk jeni ekspert zoti ministër. Dhe në radhë të parë ju duhet t’i kërkoni falje popullit të Lezhës për fyerjen dhe arrogancën që i bëtë dje.
Lleshaj: A për këtë ke ardhur ti?
Lindita Metaliaj: Jo jo, unë jam banore këtu, jam në mbështetje të qytetarëve.
Lleshaj: Kush jeni ju?
Lindita Metaliaj: Unë jam Lindita Metaliaj dhe kam ardhur në mbështetje të qytetarëve.
Lleshaj: Ku banoni ju?
Lindita Metaliaj: Banoj në lagjen “Besëlidhja” dhe jam këtu për të mbështetur qytetarët.
Lleshaj: Edhe ke ardhur këtu?! Shko edhe gjej punën.
Lindita Metaliaj: Të lutem, nuk ma tregoni ju punën mua. Ju gjeni punën ku e keni.
Qytetari: Zoti ministër, veç me çekiç nuk certifikohet pallati.
Lindita Metaliaj: Dhe turp të keni për arrogancën.
Të nderuar lexues dhe vizitorë të portalit tonë! Reklamat që shfaqen, mundësojnë që ShkodraWeb të vazhdojë të jetë e lirë dhe e pandikuar në përcjelljen e të vertetës. Faleminderit nëse i klikoni!
