Një shërbim i shoqëruar prej kohësh me probleme po hyn tashmë në një fazë të re përmirësimi në Shkodër. Bashkia ka nisur riorganizimin e transportit urban, me synim rritjen e cilësisë dhe funksionalitetit për qytetarët.
Kryetari i Bashkisë Shkodër inspektoi nga afër linjën e autobusëve, duke theksuar se, edhe pse ky shërbim funksionon prej vitesh, ai duhet të jetë në standardin e duhur dhe në përputhje me nevojat e qytetarëve. Sipas tij, të gjitha strukturat janë të angazhuara për të garantuar një transport urban më cilësor dhe më të besueshëm për banorët e Shkodrës.
Çdo 20 minuta, në çdo stacion, do të ofrohet shërbim urban në linjën Fermentim – Bahçallëk dhe anasjelltas. Kjo është faza e parë e përmirësimit të transportit publik, ndërsa në vijim pritet zgjerimi i rrjetit dhe shtimi i linjave të tjera në funksion të komunitetit.
Përveç përmirësimit të shërbimit, Bashkia ka ndërhyrë edhe në infrastrukturë, duke zëvendësuar të gjitha stacionet e autobusëve dhe duke i kthyer ato në një standard modern për Shkodrën. Ky investim shkon në sinkron me projektet e tjera zhvilluese që janë realizuar në qytet, duke kontribuar në një transport publik më dinjitoz dhe në një hapësirë urbane më funksionale për qytetarët.
