A mund të quhen më vetëm sherre mes fëmijëve, kur ka edhe përdorim të armëve të ftohta? Konfliktet mes fëmijeve të shkollave të mesme vazhdojnë, shumica e tyre jashtë vëmëndjes së mediave. Një i tillë është përsëritur të premten, ku nxënës nga zona e Vau Dejës pas orës së mësimit, kishin lënë takim për te “qeruar” hesapet mes njeri- tjetrit tek vendqëndrimi i furgonëve me të cilët udhëtojnë për në shkollë dhe anasjelltas.
Në kamera sigurie të zonës ku ndodhi konflikti, shihen dy grupe të adoleshentëve teksa fillimisht nisin konfliktin me grushta por në videon e siguruar shihet një nga adoleshentët, i cili mban në dorë një thike. Për fat të mirë nuk pati të plagosur e as të demtuar nga thika. Ka qenë ndërhyrja e një zonje, e cila ka bërë që sado pak konflikti të përfundojë.
Është lajmëruar policia, e cila ka mbërritur në vendngjarje por ka munguar plotësisht bashkëpunimi për dhënien e informacionit qoftë nga nxenësit që ndodheshin aty dhe kane parë sherrin por edhe nga ana e shoferëve të furgonëve. Ndërsa për rastin është njoftuar edhe drejtori i Policise Shkodër Gentian Berberi, i cili mësohet se po merret personalisht me rastin në fjalë.
Nga të dhënat paraprake mësohet se konflikti kishte disa ditë që kishte nisur. Një javë me parë në Zdrale u dëmtuan me mjete prerëse dy të rinj. Këtë radhë nuk kishte të lënduar nga thika, pasi për fat të mirë grushtat ishin ato që zunë vendin kryesor në këtë përplasje.
